U Jeŭropie donar śpiermy z mutacyjaj, što vyklikaje rak, staŭ baćkam 67 dziaciej

U Jeŭropie mužčyna, čyja śpierma vykarystoŭvałasia dla začaćcia dziaciej, akazaŭsia nośbitam redkaj hienietyčnaj mutacyi, jakaja moža vyklikać rak. U vyniku jaho donarskaj śpiermaj byli začatyja prynamsi 67 dziaciej u vaśmi jeŭrapiejskich krainach. Dziesiać ź ich užo zachvareli na ankałahičnyja chvaroby, u tym liku lejkoz i niachodžkinskuju limfomu, piša The Guardian.

Zdymak ilustracyjny. Fota: Andreas Arnold/picture alliance via Getty Images

Prablemu vyjavili paśla taho, jak dźvie siamji paviedamili klinikam pra rak u svaich dziaciej. Vyśvietliłasia, što śpierma, jakaja pastupiła ź Jeŭrapiejskaha banka śpiermy, mieła mutacyju ŭ hienie TP53 — jana vyklikaje spadčynnaje rakavaje zachvorvańnie, viadomaje jak sindrom Li-Fraŭmeni.

Na momant, kali mužčyna staŭ donaram u 2008 hodzie, hetuju mutacyju jašče nie ŭklučali ŭ standartnyja hienietyčnyja skryninhi, bo jana nie ličyłasia niebiaśpiečnaj. Ale paźniej daśledavańni pakazali, što 23 z 67 dziaciej atrymali hetuju mutacyju. Sam donar pakul zastajecca zdarovym.

Dzieciam, u jakich vyjaŭlenaja mutacyja, rekamiendujecca rehularna prachodzić poŭnaje MRT-abśledavańnie cieła i mozha, a ŭ darosłym uzroście — taksama małočnych załoz i brušnoj połaści.

Hety vypadak padniaŭ pytańnie nie tolki ryzyki atrymańnia ŭ spadčynu niebiaśpiečnych mutacyj, ale i adsutnaści mižnarodnych abmiežavańniaŭ na kolkaść dziaciej ad adnaho donara. Śpiecyjalisty papiaredžvajuć, što heta moža pryvieści da sacyjalnych i psichałahičnych nastupstvaŭ, asabliva kali adzin mužčyna stanovicca baćkam dziasiatkaŭ dziaciej u roznych krainach.

Taksama hetaja situacyja pakazała, jak ciažka adsačyć usie siemji, źviazanyja z adnym donaram, u vypadku surjoznaj miedycynskaj pahrozy.

Doktarka Edviž Kaśpier z Francyi zaklikała ŭvieści ahulnajeŭrapiejskaje abmiežavańnie na kolkaść dziaciej abo siemjaŭ, jakich moža mieć adzin donar, kab paźbiehnuć takoha šyrokaha raspaŭsiudžvańnia hienietyčnych chvarob.

Kamientary da artykuła