Litoŭskaja režysiorka adkazała Kurejčyku nakont skandalnaha sieryjała «Akreścina»
U Haradskim sudzie Vilni idzie raźbiralnictva pa spravie ab aŭtarskich pravach na sieryjał «Akreścina». Stužka pryśviečana zatrymanym u minskim IČU, ale publika tak dahetul jaje i nie pabačyła.
Bekstejdž zdymak sieryjała «Akreścina». Skrynšot ź videa: Malanka Media / YouTube
Režysior stužki Andrej Kurejčyk zaraz znachodzicca ŭ ZŠA i daviedaŭsia pra praces, u jakim taksama ŭdzielničaje kiraŭnik «Małanka Miedyja» i pradziusar sieryjała Pavieł Marynič, vypadkova — ź lista na svajoj elektronnaj pošcie. Sud dazvoliŭ jamu pahladzieć materyjały spravy, u tym liku finalnuju viersiju mantažu piłotnaj sieryi.
Jak śćviardžaje Kurejčyk, jon nie pabačyŭ u joj adroźnieńniaŭ ad svajoj pracy, ale zaŭvažyŭ imiony litoŭskich śpiecyjalistaŭ u citrach. Ich, jak jamu zdałosia, mahli vykarystać fiktyŭna.
Andrej Kurejčyk na zdymkach sieryjała «Akreścina» ŭ Vilni. Skrynšot ź videa: Malanka Media / YouTube
«Naša Niva» źviarnułasia da paznačanaj u citrach litoŭskaj režysiorki. Ramune Kudzmanajcie raspaviała, što sapraŭdy ŭdzielničała ŭ pracy nad sieryjałam — sa studzienia pa červień 2022 hoda.
«Ja ŭdzielničała ŭ postpradukcyi filma. Pakul heta tolki piłotnaja sieryja. Scenaryj napisaŭ i zdymaŭ film Andrej Kurejčyk, ale potym, jak mnie raskazali pradziusary, jon zmanciravaŭ film za tydzień i źjechaŭ. Jak by kinuŭ niedarobleny pradukt.
Da mianie źviarnulisia pradziusary Pavieł Marynič i Arturas Dvinelis z prośbaj papravić hetu piłotnuju sieryju. My padpisali damovu».
Režysiorka adznačyła, što pamyłka ŭ citrach nasamreč jość — jana pavinna być padpisana jak «režysior postpradukcyi».
«Ale toje, što Kurejčyk piša ŭ svaich vykazvańniach, što majo proźvišča ŭziali, kab admyć hrošy pradziusaru, heta absalutny paklop na mianie i na pradziusaraŭ», — kaža režysiorka.
Udzieł Kudzmanajcie ŭ pracy nad prajektam paćvierdziŭ i druhi litoŭski čalec kamandy, Arturas Dvinelis.
Sieryjał «Akreścina» zdymaŭsia ŭ 2022 hodzie. U prajekcie byli zadziejničany ŭkrainskija i biełaruskija akciory ŭ emihracyi, muzykanty, aktyvisty: Pavieł Haradnicki, Marharyta Laŭčuk, Andrej Tkačoŭ i inšyja. Zdymačnaja kamanda źniała tolki piłotny epizod z zapłanavanych vaśmi sieryj.
Čytajcie taksama:
«Ab biełaruskich aŭtaraŭ vycierli nohi». Kurejčyk i Marynič sudziacca za sieryjał «Akreścina»
Skandał ź sieryjałam «Akreścina» — stvaralniki adstojvajuć pravy na prajekt
Pieršaja sieryja «Akreścina» nie budzie dastupnaja biełaruskamu hledaču