«Zasudžu». Režysior Kurejčyk prakamientavaŭ navinu pra toje, što pieršaja sieryja «Akreścina» nie budzie dastupna biełarusam
Dniami adzin sa stvaralnikaŭ sieryjała «Akreścina» ananimna raskazaŭ, što pieršuju sieryju nie pakažuć biełarusam. Režysior sieryjała Andrej Kurejčyk adreahavaŭ na hetu zajavu.
Pra toje, što pieršaja sieryja prajekta «Akreścina» nie budzie dastupnaja biełaruskamu hledaču, paviedamiŭ telehram-kanał «Śviaščenny Biełavud» sa spasyłkaj na adnaho sa stvaralnikaŭ.
«I heta dobra, bo biełarusy hetaha nie zrazumiejuć. My jaje pakazvali zamiežnikam: litoŭcam, francuzam, vienhram. Im naša historyja pra 2020 hoda cikavaja, zamiežny hladač budzie jaje hladzieć», — skazaŭ toj čałaviek.
Hetyja słovy aburana prakamientavaŭ režysior Andrej Kurejčyk.
«Ja takoha cynizmu ŭ svaim žyćci nie sustrakaŭ. Film «Akreścina» płanavaŭsia i pieršapačatkova pazicyjanavaŭsia jak biełaruski prajekt dla biełarusaŭ. My zdymajem dla nas pra našu ž historyju.
Ja jak pravaŭładalnik, scenaryst, režysior skažu tak: nie, tak nie budzie. Kali, nie daj boh, heta kamanda dla vienhraŭ budzie pakazvać u abychod biełarusaŭ, ja ich zasudžu.
Bo heta ŭ dačynieńni da biełarusaŭ podłaść», — zajaviŭ Kurejčyk na svaim jutub-kanale.
Pa słovach režysiora, na vytvorčaść sieryjała było patračana kala 200 tysiač jeŭra. Jon kaža, što sam nie atrymaŭ ni kapiejki hanararu ad miedyja «Małanki», razam ź jakim zdymaŭ prajekt.
***
Sieryjał «Akreścina» pačali zdymać u Litvie ŭ pačatku minułaha hoda. Kali hledačy pabačyli kadry bekstejdžu, to aburylisia scenami rasstrełu ludziej u turmie. Sam stvaralnik potym tłumačyŭ, što heta byŭ son adnaho z hierojaŭ.
Usie pracoŭnyja materyjały pa «Akreścina» ciapier znachodziacca ŭ litoŭska-biełaruskaha vydańnia «Małanka», jakoje zajmałasia infapramocyjaj sieryjała.
Pieršaja sieryja «Akreścina» nie budzie dastupnaja biełaruskamu hledaču
«Nastupnuju sieryju ja b rabiŭ pra Bialackaha». Što čuvać pra sieryjał «Akreścina»?
Litoŭski režysior pastaviŭ z represavanymi haradziencami śpiektakli pra Kurapaty i Maryupal i źniaŭsia ŭ sieryjale pra Akreścina — pahutaryli ź im
«I pra Aśviencim treba było zdymać, kali tam hareli piečy». Intervju z Andrejem Kurejčykam pra našumieły sieryjał
Kamientary