Varšaŭski sud prosić abjavić u mižnarodny vyšuk asudžanuju za špijanaž biełarusku Astapienku

U Polščy sud prosić abjavić hramadzianku Biełarusi Darju Astapienku, asudžanuju za špijanaž, u mižnarodny vyšuk. Jaje raniej pryznali vinavataj u pracy na biełaruskija śpiecsłužby i prysudzili 20 miesiacaŭ źniavoleńnia.

Darja Astapienka. Fota profila na OnlyFans

Astapienka ŭžo praviała kala dzieviaci miesiacaŭ pad vartaj, i joj zastavałasia adsiedzieć jašče krychu bolš za miesiac da mahčymaści daterminovaha vyzvaleńnia. Adnak jaje adpuścili na čas razhladu apielacyi — i jana źnikła.

Polski sud źviarnuŭsia da Interpała z prośbaj ab mižnarodnym vyšuku dla ekstradycyi, daviedaŭsia «Biełsat» ad pres-słužby akruhovaha suda varšaŭskaha rajona Praha. Ale ŭ adkrytaj bazie Interpała jaje imia pakul nie źjaviłasia.

Astapienku zatrymali ŭ śniežni 2023 hoda ŭ Łodzi. Jaje padazravali ŭ suviaziach z Kamitetam dziaržaŭnaj biaśpieki Biełarusi. Raniej žančyna była aktyvistkaj u Biełarusi, padtrymlivała apazicyjnaha kandydata Andreja Dźmitryjeva i pracavała vieterynarkaj. Taksama zajmałasia madelnym biznesam na płatformie OnlyFans.

U Polščy jana sprabavała pratačycca ŭ šerahi biełaruskaj emihracyi, daviedacca infarmacyju pra dobraachvotnikaŭ, jakija vajavali va Ukrainie, i pieradavać hetyja źviestki biełaruskim śpiecsłužbam. Jaje vykryli paśla taho, jak jana nieaściarožna vydała siabie padčas razmovy ŭ stanie ałkaholnaha apjanieńnia. Paśla hetaha Astapienku zdali polskim śpiecsłužbam, i jaje aryštavali.

Ciapier jaje miescaznachodžańnie nieviadomaje.

Kamientary da artykuła