21-hadovaja brytanskaja ściuardesa pieravoziła amal 50 kiłahramaŭ narkotykaŭ

Šarłota Mej Li z Paŭdniovaha Łondana była zatrymanaja ŭ mižnarodnym aeraporcie Bandaranaikie ŭ stalicy Šry-Łanki Kałomba. Jaje padazrajuć u sprobie pravieźci praź miažu bolš za 45 kiłahramaŭ niebiaśpiečnaha narkotyku pad nazvaj kuš, jaki aceńvajecca prykładna ŭ 3,3 miljona dalaraŭ. Kali vina dziaŭčyny budzie dakazanaja, joj pahražaje da 25 hadoŭ źniavoleńnia, piša Onet.pl.

Šarłota Mej Li

Li pracavała stiuardesaj u čartarnaj avijakampanii TUI. Jana śćviardžaje, što nie viedała pra źmieściva svajho bahažu, a narkotyki joj padkłali. Pavodle słoŭ dziaŭčyny, jana lacieła z Banhkoka na Šry-Łanku, kab tam pačakać padaŭžeńnia tajłandskaj vizy. Zabaronienyja rečyvy vyjavili padčas pravierki ŭ aeraporcie Kałomba.

Narkotyk kuš — heta sumieś, u skład jakoj mohuć uvachodzić kanopli, fientanił, tramadoł, farmaldehid i navat, pavodle niekatorych źviestak, parašok z čałaviečych kostak. Pa danych słužbaŭ, heta najbujniejšaja zatrymanaja partyja takoha narkotyku ŭ historyi Šry-Łanki.

Na fonie hetaha zdareńnia znoŭ zahavaryli pra prablemu, kali členy avijaekipažaŭ uciahvajucca ŭ nielehalny pieravoz narkotykaŭ. U 2024 hodzie, naprykład, ułady zatrymali čatyroch členaŭ ekipaža za sprobu pierapraŭki narkotykaŭ pamiž ZŠA i Daminikanskaj Respublikaj. Takija vypadki śviedčać, što pracedury biaśpieki dla ekipažaŭ mohuć być vykarystanyja ŭ złačynnych metach praz davier i mienš strohi kantrol.

Ciapier Šarłota Mej Li čakaje vynikaŭ rasśledavańnia ŭ ciažkich umovach utrymańnia pad vartaj.

Kamientary da artykuła