U Homieli siłaviki ŭznaharodzili tajamničych hierojaŭ. Chto jany?
5 červienia Homielski abłvykankam daŭ spravazdaču ab «uznaharodžańni pradstaŭnikoŭ słužbaŭ i viedamstvaŭ Homielščyny», nie paviedamiŭšy proźviščy ŭznaharodžanych i nie nazvaŭšy navat tyja samyja «słužby i viedamstvy». Charakterna, što ŭručali ŭznaharody nie tolki staršynia abłvykankama, ale i kiraŭniki siłavych viedamstvaŭ — dziaržsakratar Rady biaśpieki Alaksandr Valfovič i staršynia KDB Ivan Cierciel. Takoha raniej nie zdarałasia, zaŭvažyŭ «Fłahštok».
Alaksandr Volfavič vinšuje Valeryja Stomu. Fota: «Homielŝina oficialno»
U aficyjnym paviedamleńni adznačajecca, što nieviadomyja ŭznaharodžanyja «za ŭzornaje vykanańnie słužbovych abaviazkaŭ». Uručanyja ŭznaharody «pa daručeńni prezidenta tym, chto efiektyŭna vykonvaŭ i praciahvaje vykonvać značnyja dziaržaŭnyja zadačy». Jakija mienavita — zastałosia zahadkaj.
Na apublikavanych fota i videa «Fłahštok» paznaŭ nie tolki čynoŭnikaŭ. Akazałasia, što siarod uznaharodžanych — šerah miedykaŭ. Naprykład, heta zahadčyk taksikałahičnaha adździaleńnia Homielskaj haradskoj kliničnaj balnicy chutkaj miedycynskaj dapamohi Valeryj Stoma, jakoha ŭznaharodžvaŭ Valfovič.
Astatnich dapamahli apaznać «Kibierpartyzany».
Ivan Cierciel uručaje ŭznaharodu Irynie Sapažkovaj. Fota: «Homielŝina oficialno»
Cierciel uručaŭ uznaharodu Irynie Sapažkovaj, jakaja pracuje ŭ abłasnym kliničnym špitali invalidaŭ Vialikaj Ajčynnaj vajny. Taksama siarod uznaharodžanych — Jaŭhien Dubroŭski z haradskoj stancyi chutkaj dapamohi.
Jašče adzin miedyk — Alaksiej Bułaŭka.
Ivan Cierciel uznaharodžvaje Dźmitryja Staraścienku. Skrynšot videa «Homielŝina oficialno»
Akramia daktaroŭ, siłaviki ŭznaharodzili i pradstaŭnikoŭ inšych śfier. U pryvatnaści, Cierciel uručyŭ uznaharodu Dźmitryju Staraścienku — jon viadomy tym, što ŭdzielničaŭ u falsifikacyjach vybaraŭ prezidenta. Heta hienieralny dyrektar AAT «Homielabłaŭtatrans», deputat abłsavieta.
Ci źviazanyja inšyja ŭznaharodžanyja z vybarčaj kampanijaj — nieviadoma.
Možna, adnak, vykazać taksama mierkavańnie, što hetyja ludzi mohuć być źviazanyja z abmienami pałonnych pamiž Ukrainaj i Rasijaj, jakija rehularna adbyvajucca praz terytoryju biełaruskaj Homielskaj vobłaści. «Homielabłaŭtatrans» daje dla hetaha aŭtobusy, a daktary mohuć mieć dačynieńnie da akazańnia miedycynskaj dapamohi rasijskim vajskoŭcam paśla abmienu.
Čytajcie taksama:
Patryjarch Kirył uznaharodziŭ Łukašenku najvyšejšaj uznaharodaj RPC
Prezident Litvy pazbaviŭ palityka, jaki niadaŭna jeździŭ u Minsk, dziaržaŭnaj uznaharody
Minadukacyi rekamienduje krucić na školnych vypusknych pieśni niaviestki Łukašenki