Izrail aficyjna pryznaŭ, što pieradaje Ukrainie sistemy SPA

Izrail upieršyniu pryznaŭ, što pieradaŭ Ukrainie sistemy supraćpavietranaj abarony (SVA) Patriot. Pra heta paviedamiŭ pasoł Izraila va Ukrainie Michael Brodski. Pavodle jaho słoŭ, havorka idzie pra kompleksy, pastaŭlenyja Izrailu ZŠA jašče ŭ pačatku 1990-ch hadoŭ. Ciapier hetyja sistemy znachodziacca va Ukrainie, piša The Moscow Times.

Prezident Ukrainy Uładzimir Zialenski na fonie ŭstanoŭki Patriot. Zdymak ilustracyjny. Fota: Jens Büttner/picture alliance via Getty Images

Michael Brodski padkreśliŭ, što heta śviedčyć pra toje, što Izrail akazvaje i vajskovuju dapamohu, choć pra heta mała havorycca publična. Jon taksama adznačyŭ, što Izrailu davodzicca bałansavać pamiž adnosinami z Maskvoj i Kijevam, ale pryjarytet dla Ijerusalima — biaśpieka izrailskich hramadzian, bo pahroza dla ich «vielmi surjoznaja».

Jašče letam minułaha hoda źjaŭlałasia infarmacyja, što ZŠA, Izrail i Ukraina abmiarkoŭvajuć pieradaču Kijevu da vaśmi ZRK Patriot, jakija padlahali śpisańniu z-za doŭhaha terminu słužby (bolš za 30 hadoŭ). U studzieni 2025 hoda paviedamlałasia, što ZŠA vyvieźli ź Izraila kala 90 rakiet dla hetych sistem i pierapravili ich u Polšču dla dalejšaj dastaŭki va Ukrainu.

Pavodle infarmacyi The New York Times, jašče adna ŭstanoŭka Patriot, jakaja prachodziła kapitalny ramont u Izraili, pavinna była być dastaŭlena va Ukrainu letam 2025 hoda. Taksama abmiarkoŭvałasia mahčymaść pieradačy kompleksaŭ z Hiermanii abo Hrecyi. Na toj momant Ukraina mieła vosiem takich kompleksaŭ, ale dva nie pracavali.

Raniej Izrail aficyjna nie paćviardžaŭ pieradaču zbroi Ukrainie, abmiažoŭvajučysia humanitarnaj dapamohaj. Pazicyja Izraila tłumačyłasia ryzykaj taho, što zbroja moža trapić da Irana i być vykarystana suprać samoha Izraila.

Kamientary da artykuła