Biełarusy staviać adnu zorku dziciačamu centru, jaki trapiŭ u skandał ź biełaruskaj movaj
Dyrektarka dziciačaha centra «Sokroviŝa nacii» ciapier prosić baćkoŭ dapamahčy padniać rejtynh u «Jandeksie».
Drama vakoł centra dziciačaha raźvićcia «Sokroviŝa nacii» nie ścichaje. U storys aficyjnaha akaŭnta źjaviŭsia skrynšot vodhukaŭ na «Jandeks. Kartach»: dva čałavieki napisali niehatyŭnyja kamientaryi nakont moŭnaj dyskryminacyi. Inšyja prosta acanili pastavili adznaku centru, i jaho rejtynh ciapier — roŭna 1,0.
Tamu kiraŭnictva prosić baćkoŭ dapamahčy vypravić situacyju i pakinuć stanoŭčy vodhuk. Pakul naviedvalniki ratavać reputacyju «Sokroviŝa nacii» nie śpiašajucca.
Nahadajem: na minułym tydni biełaruskamoŭnaja vykładčyca paskardziłasia ŭ sacsietkach, što jaje nie ŭziali na pracu ŭ «Sokroviŝa nacii» praz toje, što ŭ centry ŭsie razmaŭlajuć vyklučna na ruskaj movie.
Dyrektarka Ludmiła Žuk potym niekalki razoŭ sprabavała rastłumačyć situacyju. To jana kazała, što ŭžo dumała navat stvaryć biełaruskamoŭny hurtok, ale paśla pačatku skandału ŭ sacyjalnych sietkach razdumała. To kazała, što dazvoliła b vykładčycy vitacca i raźvitvacca z baćkami na biełaruskaj, ale ŭvieś čas razmaŭlać — heta, pa jaje mierkavańni, pierabor.
Čynoŭniki pasprabavali chutka adreahavać na skandał. Namieśnica kiraŭnika administracyi Centralnaha rajona stalicy Ludmiła Barysienka raskazała žurnalistu «Minsk-Navinaŭ», byccam u centr pryjšła pravierka i znajšła parušeńni:
— Manitorynh centra z boku Departamienta jakaści adukacyi Ministerstva adukacyi vyjaviŭ parušeńni zakanadaŭstva, źviazanyja z arhanizacyjaj adukacyjnaha pracesu i biaśpiekaj. Pradpryjemstva nie ŭzhadniła va ŭstanoŭlenym paradku prahramy dadatkovaj adukacyi dziaciej i moładzi. Vypraŭleńnie parušeńniaŭ znachodzicca na kantroli ŭpraŭleńnia pa adukacyi administracyi Centralnaha rajona Minska.
Ludmiła Žuk. Skrynšot jaje storys u instahramie
Ale ž sama dyrektarka «Sokroviŝ nacii» abvinavaciła i dziaržaŭnaha žurnalista, i čynoŭnicu ŭ chłuśni. Jana raspaviała ŭ storys, što nijakich pravierak paśla incydentu nie było.
Ludmiła Žuk taksama zajaviła, što napisała zajavu ŭ milicyju na biełaruskamoŭnuju vykładčycu, jakaja paskardziłasia na jaje centr u sacsietkach.