«U nas usie razmaŭlajuć na ruskaj movie». Dziciačy centr nie ŭziaŭ na pracu žančynu, bo jana razmaŭlaje pa-biełarusku

U sacyjalnych sietkach aktyŭna abmiarkoŭvajuć vypadak, jaki adbyŭsia z žančynaj, jakaja sprabavała pracaŭładkavacca ŭ dziciačy centr raźvićcia «Kids. Sokroviŝa nacii». U centry ŭdakładnili, ci zaŭsiody kandydatka razmaŭlaje na biełaruskaj. A kali atrymali stanoŭčy adkaz, paraili šukać inšaje miesca pracy, bo ŭ ich usie razmaŭlajuć vyklučna na ruskaj.

Pavialičyć

«Kids. Sokroviŝa nacii» — heta sietka centraŭ raźvićcia dla dziaciej i padletkaŭ, jakaja pracuje ŭ Minsku i Fanipali.

Čytačka «Našaj Nivy» patelefanavała tudy, kab daviedacca, ci sapraŭdy admova ad adnoj ź dziaržaŭnych moŭ — heta pryncypovaja pazicyja. Dyrektarka centru Ludmiła Žuk na pytańnie adreahavała vielmi emacyjna.

«Ja spytała čałavieka, ci hatova jana vykładać na ruskaj movie. Bo jość ža ŭ nas dzieci, jakim hodzik, dva. Što, ja skažu im i baćkam: «A siońnia naša nastaŭnica razmaŭlaje tolki na biełaruskaj»?! I mamy takija: «Dyk a my nie razmaŭlajem na biełaruskaj u žyćci, nam by na ruskaj dziaciej navučyć razmaŭlać!»

Ludmiła śćviardžaje, što hatovaja była prapanavać biełaruskamoŭnaj kandydatcy vieści biełaruskamoŭny hurtok (zaraz u centry takoha nie isnuje), ale praz skandał u sacsietkach užo ničoha nie choča. Ale pry hetym paćviardžaje: jana sapraŭdy paraiła žančynie šukać biełaruskamoŭny dziciačy centr.

Dyrektarka vielmi razzłavanaja tym, što jaje rašeńnie abmiarkoŭvajuć u sacyjalnych sietkach. Jana kaža, što joj telefanujuć i pišuć roznyja ludzi, jakija aburany situacyjaj. Ludmiła Žuk ličyć: jak kiraŭnik jana maje prava abirać, kaho brać na pracu. Kaža, što pavažaje biełaruskuju movu, ale nie razumieje, jakoje dačynieńnie adna z aficyjnych moŭ Biełarusi maje da jaje centra.

Nahadajem, što artykuł 14 Pracoŭnaha kodeksa zabaraniaje dyskryminacyju pa movie.

«Što, ja pavinna pierakanać klijentaŭ, što ich dzieci pavinny słuchać zaniatki na biełaruskaj movie? Naprykład, u mianie hurtok chutkačytańnia. Ja kažu nastaŭnicy: «Vykładajcie, kali łaska, na ruskaj». Kali jana admaŭlajecca, ja što, pavinna kanśpiekty na biełaruskuju movu pierakłaści, va ŭpraŭleńni ich uzhadnić, u departamiencie ŭsiudy skazać, što ŭ mianie ciapier biełaruskamoŭny centr, bo niechta choča vykładać na biełaruskaj?!

Ludmiła padkreślivaje: u jaje ŭsie dakumienty na ruskaj movie, jaje dzieci vučacca na ruskaj i ŭ centry budzie ruskaja.

«Ja pavažaju Biełaruś, ja ŭ joj žyvu, pavažaju biełaruskuju movu. Ale ŭ nas voś tak voś, usie pytańni vyšej tudy zadavajcie. Nu da čaho chočacie mianie schilić? Kab ja pierakłała nazvu centra i zrabiła «Skarby nacyi»? Nie razumieju, navošta hetyja razmovy».

• 5
• 8
• 1
• 36
• 3
• 2
• 45
• 0