Mihranty atakujuć polskich pamiežnikaŭ kałami z ubitymi ćvikami
Za minułyja vychadnyja (4—6 lipienia) na polska-biełaruskaj miažy ŭ Padlašskim adździele Pamiežnaj słužby było zafiksavana bolš za 170 sprob niezakonnaha pierasiačeńnia miažy, paviedamlaje pres-słužba viedamstva. Pry hetym nie abyšłosia i biez čarhovych napadaŭ na polskich pamiežnikaŭ, u tym liku z prymianieńniem niezvyčajnaj zbroi.
Koł z zabitymi ŭ jaho ćvikami. Takimi mihranty atakujuć pamiežnikaŭ
Polskija pamiežniki paviedamlajuć, što na niekatorych učastkach, asabliva kala viosak Čaremcha i Michałova, mihranty pavodzili siabie ahresiŭna: kidali ŭ polskija patruli butelkami, kamianiami i navat kałami z ubitymi ćvikami. Nichto ź ludziej u vyniku nie paciarpieŭ, ale byŭ paškodžany adzin słužbovy aŭtamabil.
Mihranty sprabavali pieraadoleć miažu ŭ tym liku praz pamiežnyja reki Vaŭkušanku, Śvisłač, Istačanku i Narvu. U piatnicu takich było amal 80 sprob, u subotu — bolš za 45, a ŭ niadzielu — kala 50.
Polskija pamiežniki viaduć zatrymanych mihrantaŭ
Byli zatrymanyja dvoje «kurjeraŭ», jakija dapamahajuć mihrantam pierajści miažu, a taksama dva hramadzianiny Polščy, jakija pryjechali zabrać mihrantaŭ, što ŭžo niezakonna trapili na terytoryju krainy.
Z pačatku 2025 hoda na polska-biełaruskaj miažy zafiksavana ŭžo bolš za 14 600 sprob niezakonnaha jaje pierasiačeńnia.
Čytajcie taksama:
U Polščy raskazali, jak budzie z 7 lipienia prachodzić kantrol na miažy ź Litvoj