Žychara Śvisłačy asudzili na 2 hady kałonii za napad na siłavika
U Śvisłačy mužčynu asudzili na dva hady pazbaŭleńnia voli za hvałt u dačynieńni da supracoŭnika milicyi — jon dvojčy ŭdaryŭ milicyjaniera nahoj, paviedamlaje pres-słužba Hrodzienskaha abłasnoha suda.
Fota ilustracyjnaje
Akramia taho, mužčynu abvinavacili jašče pa dvuch artykułach: za pahrozu zabojstvam (art. 186 KK) i naniasieńnie cialesnych paškodžańniaŭ (art. 153 KK).
Jak ustanaviŭ sud, mužčyna pasvaryŭsia z byłoj žonkaj, udaryŭ jaje viadrom, a potym, z nažom i siakieraj u rukach, pahražaŭ joj zabojstvam.
Kali praź niekalki dzion da jaho pryjšli milicyjanty, jon sustreŭ ich z nažom i mietaličnym prutom, pahražajučy udaram. Užo ŭ słužbovaj mašynie jon dvojčy ŭdaryŭ adnaho z supracoŭnikaŭ nahoj.
U vyniku jon atrymaŭ:
- za hvałtoŭnyja dziejańni ŭ dačynieńni da milicyjaniera — 2 hady kałonii;
- za pahrozu zabojstvam — 1 hod kałonii;
- za cialesnyja paškodžańni — 3 miesiacy aryštu.
Ahulny termin pakarańnia skłaŭ 2 hady pazbaŭleńnia voli ŭ kałonii ahulnaha režymu.
Akramia taho, sud abaviazaŭ mužčynu vypłacić 5000 rubloŭ maralnaj škody paciarpiełym.
Čytajcie taksama:
U Barysavie mužčyna raźbiŭ čužoje aŭto mietaličnym łancuhom
Žycharu Rečyckaha rajona prysudzili štraf za maciernuju nalepku na aŭto