Cichanoŭski raskazaŭ, što treba było rabić u žniŭni 2020-ha

Siarhiej Cichanoŭski patłumačyŭ, čamu nie ŭziaŭ paŭzu paśla vyzvaleńnia, vykazaŭ svoj pohlad na toje, što treba było rabić u 20-m hodzie i adkazaŭ na krytyku na adras Śviatłany Cichanoŭskaj.

Siarhiej Cichanoŭski. Fota: Radyjo Svaboda

U intervju «Radyjo Svaboda» Siarhiej Cichanoŭski pryznaŭsia, što nieadnarazova čuŭ prapanovy adpačyć, ale jon ličyć, što heta moža tolki paškodzić:

«Mnie prapanujuć: «Vaźmi paŭzu na paŭhoda». Heta šmat chto kaža, u tym liku i palityki. «Na paŭhoda adpačni, uvajdzi ŭ kurs, zdaroŭje papraŭlaj», jašče niešta. Akiej. Ale potym Siarhiej Cichanoŭski ničoha nie zrobić».

Pa słovach błohiera, «režym navat chacieŭ i ŭprošvaŭ amierykancaŭ, kab ja miesiac maŭčaŭ. Ja jak heta pačuŭ, adrazu kažu: «Jakoje maŭčaŭ! Kali jamu heta vyhadna, ja ni ŭ jakim razie nie pavinien maŭčać».

Cichanoŭski śćviardžaje, što pieršyja vyniki jaho dziejnaści možna budzie ŭbačyć užo ŭ bližejšy čas:

«Za paŭhoda vy pahladzicie. U Trampa ž jość 100 dzion dziejnaści? U ich pryniata, kali prezident prychodzić, [aceńvać] pieršyja 100 dzion, što jon paśpieŭ zrabić.

Davajcie voźmiem 100 dzion Cichanoŭskaha. Pabačym, što ja paśpieŭ zrabić. Tady ŭžo možna budzie pakazać, jakuju padrychtoŭku ja zrabiŭ. I možna budzie ŭžo kazać i pra płany. Ja dumaju, 100 dzion, try miesiacy, jakraz u siabie pryjści, zapuścić niejkija pracesy, dać spravazdaču. (…) Za svaje słovy ja adkazvaju».

Pa słovach Cichanoŭskaha, da abiacanaha im udaru pa režymie, zastałosia try tydni. Jon nie atrymaŭ padtrymki ŭ tym abjomie, jakoha čakaŭ. Adnak, u jaho «ŭ čatyry ci piać razoŭ bolš padtrymki vałancioraŭ» i «heta ŭ razy bolej, čym było ŭ 2020-m hodzie».

«Kali vy pamiatajecie, u inicyjatyŭnaj hrupie, jakaja potym stała inicyjatyŭnaj hrupaj Śviatłany, [było] ŭsiaho 200 čałaviek. A tut my ŭžo majem 450, amal 500 užo, musić, na siońniašni momant. (…) I heta ludzi, jakija ćviorda stajać na svaich pazicyjach, vierać, daviarajuć i hatovy dziejničać», — davodzić Cichanoŭski.

Što treba było rabić u žniŭni 2020-ha

Zhadvajučy 2020-ty hod, Cichanoŭski adznačaje:

«Chadžeńnie pa niadzielach, jakoje my rabili pavinna było skončycca ŭ červieni.

Potym chtości tam, niejkaje dzicia, bajaźliviec, rassyłała praz telehram-kanał: «Davajcie pa niadzielach vychodzić» (Cichanoŭski paśla vychadu intervju patłumačyŭ, što mieŭ na ŭvazie Ramana Pratasieviča, pakolki toj padčas vizitu da Cichanoŭskaha za kratami kazaŭ, što heta jon arhanizoŭvaŭ pratesty. — NN).

Treba było vychodzić 10-ha žniŭnia ranicaj i nie sychodzić užo, jak u Armienii. Za try dni, [jakija] my b tam pastajali, my b atrymali nie bolš, čym my atrymali, razumiejecie».

Na pohlad Siarhieja, kali b u žniŭni 20-ha na voli zastavaŭsia «choć adzin jaki-niebudź lidar, jon by heta skazaŭ». Ale na toj čas Łukašenka «ŭ adnu kastrulu kinuŭ» «i błohieraŭ, i Statkieviča, i Sieviarynca».

Błohier vykazvaje niezadavolenaść tym, što ciapier za vyzvaleńnie palitykaŭ zmahajecca nievialikaja kolkaść tych, chto vyjechaŭ.

«Razumiejecie, hetyja ludzi siadziać, i jany dumajuć, što vy tut za ich zmahajeciesia kožny dzień. Ofis Śviatłany Cichanoŭskaj zmahajecca za ich kožny dzień? Zmahajecca. Łatuška sa svajoj kamandaj zmahajecca? Zmahajecca. «Biełpoł» zmahajecca? Zmahajecca. Inšyja, ja viedaju, arhanizacyi. Navat «Volny chor» zmahajecca. Biaspłatna vyjazdžaje na hetyja mierapryjemstvy, dzie śpiavaje, zaradžaje. Zmahajecca.

A ŭsie astatnija? Nu heta ŭsiaho kolki čałaviek? 200. Nu, pravaabaroncy jašče. Tam jość za kadram šmat ludziej. Ale ŭsio roŭna heta nie tyja sotni tysiač, jakija źjechali. Ludzi ŭžo žyvuć inšym žyćciom. Jany «zabili», jany kinuli».

Pa słovach Cichanoŭskaha, u luboha palitviaźnia budzie rasčaravańnie, «mahčyma, nie takoje vialikaje. (…) Ale tym nie mienš usie adčuvajuć, što vy ŭžo ŭ inšym vymiareńni žyviacie, a my prosta tam zastalisia, u 2020-m».

Sam błohier adznačaje, što zadavoleny tym, što «zastaŭsia tam», «nie prajšoŭ niejki šlach, u jakim by ciapier patuch i siadzieŭ taksama na niejkich rolikach», na vokładku jakich staviŭ by toje, što skazaŭ Łukašenka, kab na ich klikali.

Pra krytyku na adras Cichanoŭskaj

Padčas intervju Cichanoŭski vykazaŭ svajo staŭleńnie da Paźniaka i inšych ludziej, jakija «abražajuć našych lidaraŭ, tych, chto sapraŭdy pracuje i nie zdajecca stolki hadoŭ»:

«Dla mianie heta złačynstva. Złačyncy. Nielha tak rabić. Ja prosta ich nie budu zaŭvažać».

Błohier prapanuje:

«Siabry, davajcie my pieramožam voś hety režym, a potym idzicie, udzielničajcie ŭ demakratyčnych pracedurach, u vybarach — ja nie chaču, i Śviatłana kazała, što nie choča, — i Zianon niachaj udzielničaje, moža, i za jaho niejki tam pracent prahałasuje da taho času».

Što tyčycca krytyki ŭ jaho adras, to Siarhiej davodzić, što «nielha abvinavačvać čałavieka, jaki choča chutka napierad rvacca ŭ tym, što jon tam uzarvaŭsia». Pry hetym na krytyku «narmalna reahuje».

Kamientary da artykuła