Cichanoŭski: Ja ž nie viedaŭ, što ludzi bajacca pakazvać tvary i bajacca za svaich svajakoŭ! Ja nabivaju huzy sam
Paśla taho, jak Siarhiej Cichanoŭski paskardziŭsia na niedastatkovuju finansavuju padtrymku z boku biełarusaŭ, na jaho adras prahučała šmat krytyki. Hetyja zakidy navat paraŭnoŭvali z łukašenkaŭskaj rytorykaj, dzie zaŭsiody «narodziec nie toj».
Paśla hetaha Siarhiej pasprabavaŭ patłumačyć, što źviartaŭsia vyklučna da aktyŭnych prychilnikaŭ, jon nie čakaje danataŭ ad usich biełarusaŭ, ale praz radki tam taksama prahladvała kryŭda.
«Heta nie kryŭda. Jak čałaviek, jaki siadzieŭ u turmie i čakaŭ, što budzie boj, ja krychu, kaniečnie, rasstroiŭsia, što atrymałasia takaja maleńkaja zvarotnaja suviaź, — dadatkova patłumačyŭ Siarhiej u kamientary dla «Našaj Nivy». — Ja razumieju, što ŭsie stamilisia, što va ŭsich prablemy. Ale palitviaźniam, kali ty siadziš ni za što, nie ździejśniŭ ničoha kryminalnaha, chočacca bačyć vyniki zmahańnia, kab adhryźli kavałak nahi režymu. A ich tam nie čutno i nie bačna. Voś naviny pra kalinoŭcaŭ nas usich tam badzioryli. Prosta realnaść nie zusim akazałasia adpaviednaj maim čakańniam. Heta mianie rasstrojvaje, ale heta nie pretenzija da ŭsich biełarusaŭ».
Taksama jon nie bačyć nijakaha padabienstva svaich pramoŭ z tym, jak pra ludziej adhukajecca Łukašenka.
«Ja nie kazaŭ, što narodziec nie toj, ja nikoha i nie nazyvaŭ narodcam. Ja źviarnuŭsia da svaich padpisantaŭ, prychilnikaŭ, jakija mianie zaŭsiody padtrymlivajuć. I jany mnie dapamahli ŭžo tym, što da mianie ŭ kamandu za tolki pieršyja dni 350 čałaviek zapisalisia. Kali ja jašče da ich ža źviarnusia — kab voś tyja, chto zarehistravaŭsia, dali niejkija hrošy — ja dumaju, jany taksama daduć.
Ale mnie nie treba, kab ludzi, u jakich niama srodkaŭ, niešta mnie davali. Ja ich nie prašu i nie patrabuju. Tamu što ŭ mianie byŭ kiejs: kali ja siadzieŭ u turmie, mnie pisaŭ biełarus ź invalidnaściu, što jon atrymlivaje piensiju pa invalidnaści i pa try rubli ŭvieś čas danaciŭ. Ja b nie chacieŭ, kab takija ludzi addavali apošniuju kapiejku.
Plus vyśvietliłasia, što ludzi bajacca za ŭciečki danych. Ja ž hetaha nie viedaŭ! U mianie nie było infarmacyi paśla turmy. Ja daviedaŭsia pra toje, što, aproč danych, bajacca navat tvary pakazvać, bajacca za svaich svajakoŭ. Ja hetaha momantu taksama nie viedaŭ! Ciapier viedaju. Ja nabivaju huzy sam — tak uładkavany kožny čałaviek. Tolki na svaich pamyłkach my vučymsia».
«NN»: Vy nie pieršy raz kažacie, što nie viedali «toje i toje», ci nie lepš było b uziać nievialikuju paŭzu, nahnać prapuščanaje za hady izalacyi, pahruzicca ŭ kantekst i zaadno adpačyć?
Siarhiej Cichanoŭski: Łukašenka choča, kab ja ŭziaŭ paŭzu. A ja ŭžo stolki prajektaŭ zapuściŭ za hety čas! Spravy ž nie vyrašajucca za adzin dzień — čym raniej zapuściš pracesy, tym chutčej budzie finał. A ja bolš za ŭsich biełarusaŭ zacikaŭleny, kab finał byŭ jak maha chutčejšy — krušeńnie hetaha režymu. Ja nie mahu sabie dazvolić navat miesiac siadzieć.
I mnie padajecca, navat kali b ja paŭhoda pasiadzieŭ i raźbiraŭsia ŭ tym, što adbyłosia, hladzieŭ usie videa, ja ŭsio adno b nie razabraŭsia da kanca va ŭsim. A tak ja budu nabivać huzy pa darozie, i ja nie baču ŭ hetym nijakaj prablemy.
«NN»: Vy kazali, što pastupova prachodzicie miedycynskaje abśledavańnie — ci jość u śpisie daktaroŭ na vizit i psichaterapieŭt? Usio ž mnohija, na žal, vychodziać z turmy z posttraŭmatyčnym razładam, i tut moža spatrebicca dapamoha.
SC: Jašče nie va ŭsich lekaraŭ ja byŭ, ale niejkich takich psichałahičnych rečaŭ pakul [niama], ničoha padobnaha. Mnie kažuć, što ja absalutna narmalny čałaviek. Ja ŭsio-taki siadzieŭ adzin. Byŭ jak u čytalnaj zale — prosta pahružaŭsia ŭ ramany i adkidvaŭ usie dumki, kab sapraŭdy nie adbyłosia niejkaj traŭmy.
Kali ja ŭ realny śviet viarnuŭsia. Tyja padziei za dva tydni, što adbylisia — dla mianie heta abjom infarmacyi naroŭni jak by ja za try hady atrymaŭ u turmie. Ale pakul ja hetym abjomam daju rady, usio narmalna.
«NN»: Pra ŭdar pa režymie, jaki vy płanujecie. Možacie chacia b namiaknuć pryblizna, u jakim sensie vy jaho bačycie? Dumaju, navat danaty chutčej źbiralisia b na nie zusim abstraktnuju spravu.
SC: Biełarusy nie danaciać, tamu što jany chacieli b viedać detali. A ja chacieŭ by atrymać davier ad biełarusaŭ. U mianie jość niekatoryja prajekty, pra jakija ja nie mahu raskazvać pakul. A niejkija rečy ja budu krychu paźniej adkryvać. Heta nie adzin niejki ŭdar pa režymie budzie. Heta budzie šmat roznych prajektaŭ, kožny ź jakich moža pryvieści da čahości. Kali ja zmahu niejki kiejs ahučyć, to ja jaho adrazu ahuču.
I kali sami biełarusy nie majuć mahčymaści dapamahčy, to jość roznyja arhanizacyi, fondy, demakratyčnyja kanały — možna budzie da ich źviarnucca. Ja znajdu hrošy ŭ lubym vypadku i ŭsio zrablu sam. A vy paśla možacie chvalić heta ci ličyć, što heta hłupstva. Ale dla mianie hałoŭnaje — vynik. Ja nie patrabuju ni ŭ kaho dapamohi: niama mahčymaści — nie dapamahajcie. Ja ŭsio roŭna budu dalej šukać srodki i iści da svajoj mety.
Kamientary