ZŠA źbirajucca pieradać Kijevu kryłatyja rakiety JASSM

Administracyja Donalda Trampa razhladaje mahčymaść adpraŭki Kijevu kryłatych rakiet JASSM, u tym liku dla zabieśpiačeńnia samalotaŭ-źniščalnikaŭ F-16, piša Military Watch Magazine na padstavie śviedčańnia infarmavanaj krynicy.

Rakieta JASSM. Fota: lockheedmartin.com

Rakiety JASSM staroj madeli majuć dalokaść prykładna 370 km, taksama isnuje raznavidnaść z dalokaściu bolš za 800 km.

U zonu paražeńnia pieršych traplajuć usie pryhraničnyja z Ukrainaj rehijony, a taksama Vałhahradskaja, Kałužskaja, Lipieckaja, Arłoŭskaja, Smalenskaja, Tamboŭskaja i navat Kalininhradskaja vobłaści, Adyhieja i Krasnadarski kraj, uklučajučy bazy Vajskova-marskoha fłotu ŭ Navarasijsku.

U druhim vypadku pad pahrozaj apyniecca vialikaja častka centralnaj Rasii, u tym liku Maskva, a taksama Kaŭkaz, Pavołža i Leninhradskaja vobłaść.

JASSM pastupiła na ŭzbrajeńnie armii ZŠA ŭ 2003 hodzie. Jana spałučaje abmiežavanyja mahčymaści ŭchileńnia ad radaraŭ z vysokim uzroŭniem dakładnaści naviadzieńnia i hruzapadymalnaściu bojehałoŭki 450 kh. Ciapier hetuju rakietu ekspłuatujuć čatyry krainy, uklučajučy Polšču, jakaja atrymała 110 štuk dla svaich źniščalnikaŭ F-16.

Raniej prezident ZŠA Donald Tramp anansavaŭ «važnuju zajavu» adnosna Rasii 14 lipienia. Krynicy vydańnia Axios paviedamlali, što jon abviaścić ab pieradačy Ukrainie rakiet, zdolnych bić pa Maskvie. 

Kamientary da artykuła