MARH pravieryŭ bujnyja rynki i znajšoŭ šmat parušeńniaŭ

Ministerstva antymanapolnaha rehulavańnia i handlu praviało pravierki na asnoŭnych rynkach krainy i vyjaviła šerah parušeńniaŭ. U vyniku było vydadziena bolš za 300 rekamiendacyj tym pradprymalnikam, čyja dziejnaść nie była aficyjna zarehistravanaja ŭ Handlovym rejestry.

Parušeńni zafiksavali na minskich rynkach «Kamaroŭka», «Tutejšy», «Čyžoŭski», «Malinaŭka», a taksama na rynku «Novy Lebiadziny» kala stalicy.

Akramia taho, parušeńni byli vyjaŭleny na «Bresckim rynku», «Smalenskim rynku» ŭ Viciebsku, «Homielskim centralnym rynku», «Centralnym rynku» ŭ Hrodnie i na «Centralnym rynku Mahilova».

Infarmacyja pra niedachopy była pieradadziena ŭ abłvykankamy, kab tyja pryniali nieabchodnyja miery.

Siarod inšych parušeńniaŭ, adznačanych MARH:

• na rynku «Tutejšy» znoŭ vyjavili prodaž praterminavanaha syru;
• na «Bresckim rynku» asobnyja indyvidualnyja pradprymalniki pradavali harodninu pa zavyšanych koštach;
• na «Novym Lebiadzinym» niekatoryja pradprymalniki i dźvie firmy chavali častku vyručki i paźbiahali vypłaty padatkaŭ — hetyja materyjały ŭžo pieradadzienyja ŭ Ministerstva pa padatkach i zborach.

MARH taksama paviedamiŭ, što rychtujecca novy pravavy akt, jaki ŭzmocnić adkaznaść administracyj rynkaŭ i pradaŭcoŭ za parušeńni. Metaj jaho zajaŭlajecca «naviadzieńnie paradku» na rynkach krainy.

Kamientary da artykuła