Kolki ciapier kaštuje kava — mołataja, u ziarniatach i raspuščalnaja? Niekatoryja ceny ździŭlajuć

Biełarusy aktyŭna abmiarkoŭvajuć padaražańnie kavy — asobnyja pakunki mohuć kaštavać da 120-150 rubloŭ. Rost cen vyklikany suśvietnym nieŭradžajem kavavaha ziernia. Pahladzieli, jak adroźnivajucca ceny na roznyja typy kavy.

Ilustracyjny zdymak

Mołataja kava 

Pačak mołataj kavy 500 hramaŭ u «Je-dastaŭcy» kaštuje ad 27,79 da 54,08 rubla. Samy darahi — niamiecki Dallmayr, jaki možna nabyć za 51-54 rubli. Tańniej atrymlivajecca taksama niamiecki Jacobs i italjanski Merrild — 27-39 rubloŭ.

Taki ž Merrild u Green pradajecca pa 35,96 rubla. Šviedskaja mołataja kava Lofbergs tut kaštuje pa 40 rubloŭ za 500 hramaŭ.

Ceny na mołatuju kavu na sajcie «Je-dastaŭcy»

Kava ŭ ziarniatach

Paŭkiłahrama kavy ŭ ziarniatach u anłajn-kramie «Jeŭraopta» kaštujuć ad 38,55 da 60,55 rubla. Niamiecki Movenpick takim čynam možna nabyć za 55 rubloŭ, a italjanski Bristot, President ci Carraro Tazza D`oro — za 38-60 rubloŭ.

U Green 500 hramaŭ kavy ŭ ziarniatach «Miestnoje iźviestnoje» možna nabyć za 38-43 rubli. Toj ža Movenpick tut kaštuje pa 50,88 rubla, a Dallmayr ci Jacobs možna nabyć za 55-59 rubloŭ. Na źnižcy zaraz Lavazza Qualita Oro — pačak pradajecca za 66,89 rubla zamiest 119,99.

Taksama na źnižcy zaraz kava ŭ ziarniatach Barista ŭ kramie «Kapieječka» — tam pačak 800 hramaŭ možna nabyć za 50,99 rubla.

Ceny na kavu ŭ ziarniatach na sajcie anłajn-kramy Green

Raspuščalnaja kava

Raspuščalnuju kavu ŭ «Je-dastaŭcy» možna pabačyć tolki rasijskuju: 500 hramaŭ Nescafe ci Jacobs kaštujuć pa 47,99-56,99 rubla.

U Green 400 hramaŭ rasijskaha Jacobs abyducca ŭ 51,32 rubla, a 450 hramaŭ rasijskaha Nescafe — u 54,18 rubla.

Jašče adna źnižka ŭ «Kapieječcy» na raspuščalnuju kavu Fresco — 23,29 rubla za 190 hramaŭ.

Ceny na raspuščalnuju kavu ŭ katałohu «Je-dastaŭki»

A jak u susiedziaŭ?

Padaražańnie samaha papularnaha paśla vady napoju adbyvajecca pa ŭsim śviecie — za apošni hod siaredni košt jaho pavysiŭsia amal udvaja. Na heta ŭpłyvajuć pieradusim źmieny ŭ klimacie i nieŭradžaj ziernia, a taksama pošliny na impart u Amieryku — krainu z samym vysokim spažyvańniem kavy ŭ śviecie.

U Litvie 500 hramaŭ mołataj kavy Dallmayr kaštujuć kala 8-10 jeŭra (30-38 biełaruskich rubloŭ). 100 hramaŭ raspuščalnaj kavy Jacobs tam možna nabyć za 8 jeŭra. Kiłahram Lavazza Qualita ŭ zierniach — 21 jeŭra (79,7 biełaruskaha rubla). Heta ceny bieź źnižak — na akcyi (a jany ŭ kramach rehularna) kava kaštuje amal udvaja tańniej.

U Polščy pačak mołataj kavy Jacobs 500 hramaŭ pradajuć pa 36,35 złotaha (32 biełaruskija rubli), Lavazza Qualita Oro u zierniach — pa 105 złotych (93,6 biełaruskaha rubla) za kiłahram, a raspuščalnuju Nescafe Classic — pa 35 złotych (31 biełaruski rubiel) za 200 hramaŭ.

Kamientary da artykuła