Pry Bresckaj krepaści ŭžo dva tydni harać vohniščy. Ludzi skardziacca na dym i smurod

U Breście žychary skardziacca na toje, što ŭžo dva tydni na terytoryi Bresckaj krepaści palać drevy. Ludzi, čyje damy znachodziacca pobač, kažuć, što niemahčyma adčynić vokny abo vyviesić bializnu — u pavietry visić dym i staić smurod. Adna z žycharak navat źniała videa i vykłała jaho ŭ tyktok, dzie rolik chutka nabraŭ bolš za 30 tysiač prahladaŭ, piša BG.Media.

Pavalenyja drevy na terytoryi Bresckaj krepaści ŭ mai 2025 hoda. Fota: Brescki harvykankam

Pavodle słoŭ žančyny, supracoŭniki, jakija zajmajucca spalvańniem, na pytańnie pra dazvoł adkazali, što heta «rasparadžeńnie mera». Ludzi niekalki razoŭ vyklikali MNS i milicyju, adnojčy navat byŭ vypisany štraf. Adnak hareńnie praciahvajecca, i, jak adznačajuć śviedki, «miesca hareńnia pieramiaščajecca źleva naprava» i ciahniecca ŭžo navat nie dva tydni, a amal paŭtara miesiaca.

@user6268431071299

♬ Danger - SoundAudio

Pakul haradskija ŭłady nie dali aficyjnych tłumačeńniaŭ, adnak viadoma, što z maja 2025 hoda ŭ Bresckaj krepaści prachodziać maštabnyja raboty pa ŭparadkavańni. Siarod inšaha tam rasčyščajuć terytoryi, dzie redka byvajuć turysty: prybirajuć pavalenyja drevy, praredžvajuć krony, a taksama navodziać paradak na Pahraničnym i Špitalnym astravach.

Uparadkavańnie Bresckaj krepaści ŭ mai 2025 hoda. Fota: Brescki harvykankam

Raniej paviedamlałasia, što raboty achoplivajuć šeść učastkaŭ, uklučajučy nasypy i vały pa pierymietry, a taksama zony kala Kobrynskaha ŭmacavańnia, hałoŭnaha ŭvachodu i Terespalskich varot. Častkaj hetych rabot moža być i spalvańnie zališniaj raślinnaści, adnak dakładnaha paćviardžeńnia hetamu pakul niama.

Miascovyja žychary zaklikajuć ułady pryniać miery, bo dym škodzić zdaroŭju, asabliva dzieciam i pažyłym ludziam. Niekatoryja prapanujuć zamiest spalvańnia addavać drovy hramadskim ustanovam, naprykład, łaźniam.

Kamientary da artykuła