Stała viadoma, kolki atrymajuć biełaruskija artysty za vystupleńnie na načnym kancercie ŭ Bresckaj krepaści
U noč z 21 na 22 červienia ŭ Bresckaj krepaści projdzie kancert-rekvijem, pryśviečany Dniu ŭsienarodnaj pamiaci achviar Vialikaj Ajčynnaj vajny i hienacydu biełaruskaha naroda. Mierapryjemstva nazvali «4 hady doŭhaj darohi…», i jano pačniecca a pieršaj hadzinie nočy, piša BG.Media.
Na kancercie vystupiać pieravažna rasijskija artysty, viadomyja padtrymkaj palityki Kramla i vajny suprać Ukrainy: hurt «Lube» ź Mikałajem Rastarhujevym, Zara, Dzianis Majdanaŭ, Piotr Zacharaŭ, akcior Maksim Drozd i inšyja.
Taksama ŭ śpisie — biełaruskija vykanaŭcy: Alaksandra Hajduk, narodny artyst Biełarusi Uładzimir Haściuchin, art-hrupa «Biełarusy» i dziaržaŭnaja akademičnaja charavaja kapeła imia Šyrmy.
Zhodna z danymi z sajta dziaržaŭnych zakupak, za vystup Alaksandry Hajduk i charavoj kapeły imia Šyrmy zapłaciać 13 800 rubloŭ. Jak mienavita padzielać hetuju sumu pamiž artystkaj i kalektyvam — nie ŭdakładniajecca. Infarmacyja pra inšyja hanarary (naprykład, rasijskim artystam) pakul nie apublikavanaja.
Alaksandra Hajduk źviazanaja z Brestam — choć i naradziłasia ŭ Siaredniaj Azii, škołu skončyła ŭ hetym horadzie. U dziacinstvie zajmałasia muzykaj i chareahrafijaj. U apošnija hady šmat vystupaje, udzielničaje ŭ mierapryjemstvach i zdymkach, ale, jak kaža sama, asabistaje žyćcio ŭ jaje nie skłałasia — z trecim mužam jany ŭ šlubie tolki farmalna.
Apošni raz Hajduk vystupała ŭ Breście ŭ śniežni 2024 hoda padčas prapahandysckaj akcyi «Marafon adzinstva».
Uličvajučy, što tolki na vystupleńnie Hajduk i choru vydatkavana amal 14 tysiač rubloŭ, možna zdahadvacca, što zaprašeńnie rasijskich artystaŭ abyšłosia ŭ značna bolšuju sumu.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ7
Kamientary