Kitaj dapamoža biełarusam zmahacca ź lasnymi pažarami
U Kitai paabiacali vydzielić Ministerstvu lasnoj haspadarki Biełarusi 2 miljony dołaraŭ u miežach mižnarodnaha trochbakovaha prajekta, paviedamiła pres-słužba ministerstva.
Ministr lasnoj haspadarki Biełarusi Alaksandr Kulik i pasoł Kitaja ŭ Biełarusi Čžan Veńčuań. Fota: t.me/minleshoz
Hetyja hrošy pastupiać z kitajskaha Fondu hłabalnaha raźvićcia i supracoŭnictva i buduć vykarystanyja dla ŭmacavańnia materyjalna-techničnaj bazy biełaruskich lashasaŭ — u pieršuju čarhu Bresckaj i Homielskaj abłaściej.
Prajekt nosić nazvu «Achova lasoŭ Biełarusi: kompleksnaja inicyjatyva pa zabieśpiačeńni hatoŭnaści da praduchileńnia i reahavańnia na pažary na miascovym uzroŭni».
Vybar mienavita dvuch paŭdniovych biełaruskich abłaściej nievypadkovy: mienavita tam nazirajecca najbolš składanaja pažaraniebiaśpiečnaja situacyja — tolki ŭ Bresckaj vobłaści z pačatku hoda adbyłosia 220 lasnych pažaraŭ, što składaje tracinu ŭsich uzharańniaŭ u krainie.
Ministr lasnoj haspadarki Alaksandr Kulik adznačyŭ, što, niahledziačy na dasiahnutyja pośpiechi, prablema lasnych pažaraŭ zastajecca aktualnaj. U Biełarusi, adnak, užo pracuje aŭtamatyzavanaja sistema manitorynhu i rańniaha vyjaŭleńnia pažaraŭ, jakaja achoplivaje 100% lasoŭ.
Srodki z Kitaja dapamohuć jašče bolš pavysić efiektyŭnaść u papiaredžańni i likvidacyi lasnych pažaraŭ, u tym liku na ciažkadastupnych i bałotnych terytoryjach. Taksama praduhledžvajecca supracoŭnictva z kitajskimi śpiecyjalistami, abmien dośviedam i ŭzajemnyja vizity.