U Budsłavie archieołahi adkapali staražytny padmurak kaścioła
Padčas archieałahičnych raskopak u Budsłavie navukoŭcy znajšli kamienny padmurak pieršaha kaścioła, jaki, chutčej za ŭsio, byŭ pabudavany ŭ pieršaj pałovie XVII stahodździa. Pra heta paviedamiŭ Instytut historyi Nacyjanalnaj akademii navuk Biełarusi.
Fota: t.me/iinanb
Ciapier u Budsłavie viadziecca rekanstrukcyja Kaścioła Uniebaŭziaćcia Najśviaciejšaj Dzievy Maryi. Płanujecca, što hety chram stanie važnym katalickim centram krainy. U raskopkach udzielničajuć i historyki z NAN Biełarusi.
Fota: t.me/iinanb
Padčas daśledavańniaŭ byli znojdzienyja častki staroha padmurka — jany častkova znachodziacca pad sučasnym kaściołam, ale asnoŭnaja častka, u tym liku i babiniec (piaredniaja častka chrama), — za jaho miežami.
Fota: t.me/iinanb
Pavodle źviestak archieołahaŭ, budynak mieŭ pamiery prykładna 26 na 13 mietraŭ, byŭ nakryty čarapicaj, a ścieny byli pafarbavanyja vochraj. Pad kaściołam była raźmieščanaja krypta — padziemnaje pamiaškańnie, vierahodna, dla pachavańniaŭ.
Fota: t.me/iinanb
11 maja 2021 hoda ŭ kaściole ŭ Budsłavie zdaryŭsia mocny pažar. Pažarniki zmahalisia z ahniom kala siami hadzin. U vyniku całkam zhareŭ dach nad centralnaj častkaj chrama, a taksama paciarpieŭ unikalny baročny arhan — samy vialiki ŭ Biełarusi.
Kaścioł u Budsłavie źjaŭlajecca značnym pomnikam architektury i historyi. Kamienny chram uzvodziŭsia z 1633 pa 1783 hod, a ŭpieršyniu ŭ dakumientach jon zhadvajecca jašče ŭ 1504 hodzie. Siońnia jon viadomy jak Nacyjanalny sanktuaryj Maci Božaj Budsłaŭskaj.
Čytajcie taksama:
U Budsłavie pačalisia archieałahičnyja raskopki
Zdareńnie na feście ŭ Budsłavie: padčas nabaženstva ŭpaŭ dron — cudam nichto nie paciarpieŭ
U Budsłaŭski kaścioł viarnuli statuju, paškodžanuju pry pažary