U Šatłandyi školnik znajšoŭ na plažy abłomki karabla XVIII stahodździa

Na Arkniejskich astravach u Šatłandyi školnik u minułym hodzie padčas prabiežki zaŭvažyŭ na plažy reštki draŭlanaha karabla, jakija tyrčali ź piasku. Paśla hetaha archieołahi razam ź miascovymi žycharami vyśvietlili, što heta mohuć być reštki vajskovaha karabla XVIII stahodździa pad nazvaj «Hraf Čatem», jaki ŭdzielničaŭ u vajnie za niezaležnaść ZŠA, piša Associated Press.

Abłomki 250-hadovaha karabla. Fota: Historic Environment Scotland

Reštki karabla źjavilisia na pavierchni paśla bury, jakaja źniesła płast piasku. Miascovyja fiermiery vyvieźli adtul niekalki ton dubovych biarvieńniaŭ, a navukoŭcy praviali daśledavańni. Analiz draŭniny pakazaŭ, što jana pachodzić z paŭdniovaj Anhlii siaredziny XVIII stahodździa.

Archieołaham udałosia źviazać znachodku z kankretnym karablom dziakujučy archiŭnym zapisam. U vyniku jany pryjšli da vysnovy, što heta moža być 24-harmatny frehat Karaleŭskaha fłotu «Hraf Čatem», jaki ŭdzielničaŭ u sprobach Vialikabrytanii zachavać amierykanskija kałonii ŭ 1770-ch hadach.

U 1784 hodzie karabiel pradali i jon pačaŭ płavać u Arktycy, dzie zajmaŭsia kitabojnym promysłam — tłušč kitoŭ u toj čas vielmi canili.

Śpiecyjalisty adznačajuć, što źmieny klimatu ŭpłyvajuć na pryrodnyja ŭmovy i mohuć pryvieści da taho, što padobnyja znachodki buduć adbyvacca čaściej.

Miascovaja žycharka Rut Pis padkreśliła, što hety vypadak nahadaŭ, jak minułaje ŭ takich miescach zaŭsiody pobač — ci to vidavočna, ci schavana pad pavierchniaj.

Kamientary da artykuła