Archieołahi pačali raskopki na Zasłaŭskim zamku. U płanach — vyjavić vialikuju bramu
Da Dažynak płanujuć zakansiervavać i muzieifikavać bramu hetaha adnaho ź pieršych bastyjonnych zamkaŭ staraitaljanskaha typu na Biełarusi. Voś što pra jaho viadoma.
Jak paviedamlaje telehram-kanał Instytuta historyi NAN Biełarusi, palavyja raboty na terytoryi Zasłaŭskaha zamka pačalisia 2 červienia.
Daśledavańni pravodziacca ŭ miežach dziaržaŭnaj navukovaj prahramy «Hramadstva i humanitarnaja biaśpieka biełaruskaj dziaržavy» (2021—2025) pa zadańni ź dziŭnaj nazvaj «Archieałahičnaja spadčyna jak faktar zabieśpiačeńnia humanitarnaj biaśpieki».
Samyja staražytnyja ŭmacavańni haradzišča «Vał», pad jakoj hetaje miesca ŭniesiena ŭ Dziaržaŭny śpis historyka-kulturnych kaštoŭnaściej (kab adroźnivać ad haradzišča «Zamečak», dzie pavodle padańnia žyła Rahnieda z synam Iziasłavam), uźviedzieny na rubiažy XI-XII stahodździa.
U kancy XVI — XVII stahodździ, mahčyma, jak umacavanaja rezidencyja ŭładalnika Zasłaŭja Ivana Hlaboviča, adnačasova z kalvinskim zboram byŭ uźviedzieny adzin ź pieršych bastyjonnych zamkaŭ na terytoryi Biełarusi, jaki maje rysy staraitaljanskaj fartyfikacyjnaj sistemy.
U płanie zamak maje vyhlad niapravilnaha čatyrochvuholnika, abkružanaha rovam. Bastyjony i vały, pavodle daśledavańniaŭ XIX stahodździa, byli pieršapačatkova abmuravany kamieniem.
Pa centry vałoŭ byli dadatkovyja bastyjony, jakija dobra bačnyja na płanie 1840 hoda. Da kanca XIX st. hetyja dadatkovyja ŭmacavańni byli častkova razabranyja miascovymi žycharami, ale na vałach zachoŭvalisia reštki muravanych ścien i brustvieraŭ.
Na paŭdniovym vale zamka znachodziłasia tradycyjnaja dla ziamiel Biełarusi dvuchpaviarchovaja ŭjaznaja brama. Taŭščynia jaje muroŭ dasiahała 2 mietraŭ. Brama mieła padvojnyja varoty i dobra fłankiravałasia z narožnaha bastyjona. Pad bramaj znachodziłasia turma ŭ vyhladzie doŭhaha muravanaha tunela.
Roŭ abvadniaŭsia praź sistemu sažałak na Śvisłačy i Čarnicy, pieratvarajučy zamak va ŭmacavańnie astraŭnoha typu. 3 «miestam» zamak złučaŭ draŭlany most, apošni pralot jakoha, jak mierkavaŭ historyk Michaił Tkačoŭ, abapirajučysia na anałohiju ź inšymi zamkami, padymaŭsia z bramy śpiecyjalnym kałaŭrotam.
Ad mahutnaj bramy źbierahlisia nižnija častki ścien, jakija ciapier i ŭzialisia daśledavać archieołahi.
Da daśledavańnia siońnia pryciahnuty nie tolki navukoŭcy-archieołahi, ale i rabočyja, vałanciory i navučency — u tym liku pry padtrymcy Minskaha rajvykankama.
Jak paviedamlajecca, raboty buduć praciahvacca da kanca červienia z mahčymym padaŭžeńniem u zaležnaści ad umoŭ nadvorja. Pa zaviaršeńni raskopak płanujecca raspracoŭka prajekta dla restaŭracyi i muzieifikacyi abjekta.
Uvosień hetaha hoda Zasłaŭje prymie abłasnyja Dažynki. Praviadzieńnie śviata pracaŭnikoŭ siała ŭžo stała pryčynaj źniščeńnia histaryčnych budynkaŭ karčmy, apteki i žyłoha doma na hałoŭnaj Savieckaj vulicy Zasłaŭja, choć jašče ŭ minułym dziesiacihodździ hety abjekty achoŭvalisia jak pomniki historyi i kultury.
U Zasłaŭi da Dažynak začyščajuć histaryčnuju zabudovu, jakuju brałasia achoŭvać dziaržava
Staŭ viadomy sapraŭdny hod zasnavańnia Mienska. Adkryćcio było vostrasiužetnym navukovym detektyvam
U Zasłaŭi źnieśli da Dažynak karčmu i kramu, jakija raniej ličylisia pomnikami architektury
Adnavilisia raskopki na Miency, cikavaja znachodka ŭžo ŭ pieršy dzień
Kamientary
ŭsiaisnaha "vyjavić" (- JOŚĆ, JAK MINIMUM 4 BIEŁARUSKIJA SŁOVY DLA JAHO ZAMIENY!!! Navošta jaho SAVAĆ praz artykuł! )
i
nieisnujučaha NIDZIE!!!! "narožnaha" !