Śledam za servisami «Aerafłota» ŭ Rasii lahli i «Dziaržpasłuhi»
U Rasii pierastaŭ pracavać adziny partał dziaržaŭnych pasłuh «Dziaržpasłuhi». Pavodle servisu Downdetector, najbolš skarhaŭ pastupaje z Maskvy, Sankt-Pieciarburha, a taksama z roznych rehijonaŭ, u tym liku Jamała-Nienieckaj aŭtanomnaj akruhi i Śvierdłoŭskaj vobłaści, piša The Moscow Times.
Fota: ahienctva «Moskva»
Ludzi skardziacca na niemahčymaść zajści na sajt, pamyłki pry zahruzcy i niedastupnaść asabistaha kabinieta. Pieraboi zakranuli jak veb-viersiju, tak i mabilny dadatak. Terminy adnaŭleńnia pracy pakul nieviadomyja.
Zboj adbyŭsia nieŭzabavie paśla chakierskaj ataki na IT-sistemy avijakampanii «Aerofłot». Z-za ŭmiašańnia chakieraŭ amal sotnia rejsaŭ była skasavanaja, što pryviało da kałapsu ŭ maskoŭskim aeraporcie «Šaramiećcieva».
Adkaznaść za ataku ŭziali na siabie hrupoŭki Silent Crow i «Kibierpartyzany». Jany zajaŭlajuć, što atrymali dostup da ŭsich karparatyŭnych sistem, uklučajučy dakumienty, zapisy i kampjutary supracoŭnikaŭ. Pavodle ich słoŭ, praniknieńnie stała mahčymym, siarod inšaha, praz toje, što kiraŭnik «Aerofłota» nie mianiaŭ parol z 2022 hoda, a kampanija vykarystoŭvała sastarełyja sistemy Windows XP i Windows 2003.
Hienprakuratura Rasii paćvierdziła fakt uzłomu i raspačała kryminalnuju spravu adnosna niepravamiernaha dostupu da kampjutarnaj infarmacyi. Raskamnahlad pakul nie paćviardžaje, što asabistyja danyja klijentaŭ i supracoŭnikaŭ sapraŭdy skampramietavanyja.