Tramp: Rasija maje tolki 10 dzion, kab spynić vajnu suprać Ukrainy. Jany pačynajucca siońnia

Prezident ZŠA Donald Tramp papiaredziŭ Rasiju: jana maje 10 dzion, kab spynić vajnu suprać Ukrainy. U advarotnym vypadku ZŠA ŭviaduć novyja mytnyja pošliny i inšyja miery suprać Maskvy. Pra heta Tramp paviedamiŭ žurnalistam pierad vyletam z Šatłandyi 29 lipienia.

Donald Tramp. Fota: Kevin Dietsch/Getty Images

Donald Tramp skazaŭ, što nie ŭpeŭnieny, ci paŭpłyvajuć hetyja zachady na Rasiju, ale jon hatovy ich užyć. Kali Rasija nie spynić vajnu da 8 žniŭnia, buduć uviedzienyja žorstkija ekanamičnyja miery.

«Chočacie vialikuju siensacyju? Dziesiać dzion ź siońniašniaha dnia. U nas jość siensacyja. I tady, viedajecie, my ŭviadziom pošliny i inšyja miery, ale ja nie viedaju, ci paŭpłyvaje heta na Rasiju, tamu što jana, vidavočna, choča, mabyć, praciahvać vajnu», — zajaviŭ prezident ZŠA.

Raniej, 28 lipienia, Tramp adznačyŭ, što niama sensu čakać daŭžej i daŭ Rasii 10—12 dzion, kab zaviaršyć vajnu. Jon taksama padkreśliŭ, što jamu nie chočacca ŭvodzić sankcyi, bo jon «lubić rasijski narod», ale Pucin nie pakidaje inšaha vybaru. Pry hetym Tramp nie zacikaŭleny ŭ asabistaj sustrečy z Pucinym.

Pres-sakratar Pucina Dźmitryj Piaskoŭ zajaviŭ, što ŭ Kramli źviarnuli ŭvahu na zajavu Trampa, ale praciahvajuć nazyvać vajnu «śpiecyjalnaj vajennaj apieracyjaj».

Jašče 14 lipienia Tramp vykazvaŭ niezadavolenaść dziejańniami Pucina i papiaredžvaŭ, što kali pieramirje nie budzie dasiahnuta na praciahu 50 dzion, ZŠA ŭviaduć vielmi vialikija myty suprać Rasii i jaje handlovych partnioraj.

U Biełym domie paśla tłumačyli, što havorka idzie pra 100% pošliny na rasijski impart i «druhasnyja sankcyi» suprać tych krain, jakija praciahvajuć kuplać rasijskuju naftu. Z ulikam taho, što handal pamiž ZŠA i Rasijaj zaraz minimalny, hetyja miery mohuć udaryć pierš za ŭsio pa inšych partniorach Rasii.

Kamientary da artykuła