Źviarnułasia 11 lipienia, zapisali na 22 vieraśnia. U Žodzinie abmiarkoŭvajuć čerhi ŭ balnicu

Žychary Žodzina padniali pytańnie ab dastupnaści płanavaj miedycynskaj dapamohi. Nahodaj stała historyja haradžanki, jakaja sutyknułasia z doŭhim čakańniem lačeńnia ŭ dzionnym stacyjanary, piša Ex-press.live.

Zdymak ilustracyjny. Fota: zhcgb.by

«Chaču padniać pytańnie pa miedycynie. U mianie ŭźnikła nieabchodnaść padlačycca. Minski kardyjołah parekamiendavaŭ kropielnicy. Da doktara ŭ Žodzinskaj paliklinicy ja źviarnułasia 11 lipienia. Mianie zapisali na dzionny stacyjanar tolki na 22 vieraśnia. Čarha — 2,5 miesiaca. Pytańnie da hałoŭnaha ŭrača CHB: ci možna pašyryć dzionny stacyjanar, kali ŭ ludziej jość patreba ŭ lačeńni i prafiłaktycy zachvorvańniaŭ?» — zapytałasia haradžanka ŭ haradskim čacie.

U adkaz na zvarot Žodzinskaja centralnaja haradskaja balnica dała aficyjny kamientar:

«U ramkach dzionnaha stacyjanara akazvajecca płanavaja miedycynskaja dapamoha. Pastanovaj Ministerstva achovy zdaroŭja Respubliki Biełaruś ad 16.08.2023 hoda ŭstanoŭleny termin jaje čakańnia — nie bolš za 90 rabočych dzion. Pry nieabchodnaści ekstrannaj dapamohi pacyjenta špitalizujuć u stacyjanar. Taksama paviedamlajem, što z 1 žniŭnia dzionny stacyjanar CDB, raźmieščany ŭ paliklinicy, budzie pracavać u dźvie źmieny».

Adnak haradžanie miarkujuć, što hałoŭnaja prablema — nie ŭ pamiaškańni abo abstalavańni, a ŭ niedachopie kadraŭ:

«U nas nie pamiaškańniaŭ nie chapaje, a kadraŭ».

«U nas niama kamu pracavać».

Žychary horada zadajucca pytańniem, jakija kroki robiacca dla palapšeńnia situacyi:

«Pytańnie tady da ŭładaŭ horada i hałoŭnaha doktara. Z čym heta źviazana i što robicca, kab kadry zapoŭnili nišu?»

Na heta pytańnie ŭ Žodzinskaj CHB taksama dali adkaz:

«Z 1 žniŭnia ŭ horad dla pracy ŭ CHB pryjduć 11 daktaroŭ i 15 śpiecyjalistaŭ ź siaredniaj miedycynskaj adukacyjaj».

Adnak haradžanie nastrojenyja skieptyčna:

«A kolki śpiecyjalistaŭ z najaŭnych sydzie na 1 žniŭnia? Nie dumaju, što mocna niešta źmienicca ŭ biahučaj situacyi».

Pavodle aficyjnych źviestak za maj 2024 hoda, ahułam u Žodzinie zabiaśpiečanaść kadrami składaje 96,2%, pry hetym u achovie zdaroŭja — 98,6%.

Kamientary da artykuła