Łukašenka svaim ukazam abmiežavaŭ chutkaść elektrasamakataŭ na tratuarach da 10 km/h

Alaksandr Łukašenka 5 žniŭnia padpisaŭ ukaz №295, jaki ŭnosić źmieny ŭ Praviły darožnaha ruchu. Śćviardžajecca, što dakumient padrychtavany z ulikam sučasnych umoŭ i pažadańniaŭ hramadzian. 

Fota ilustracyjnaje

Adnoj z hałoŭnych navinak stała abaviazkovaje śpiešvańnie ravarystaŭ i karystalnikaŭ samakataŭ pry pierasiačeńni prajeznaj častki. Heta źviazana z rostam kolkaści DTZ ź ich udziełam — kala 900 vypadkaŭ za apošnija dva hady.

Taksama pierahledžanyja praviły karystańnia piersanalnymi mabilnymi srodkami — elektrasamakatami, siehvejami, monakołami. Udakładniena, što da ich adnosiacca pryłady z elektramatoram i maksimalnaj chutkaściu da 25 km/h.

Dla ich usich uvodziacca chutkasnyja abmiežavańni: nie bolš za 25 km/h na viełaściežkach i 10 km/h na tratuarach. Zabaraniajecca jeździć pa tratuarach na ciažkich pryładach, masa jakich pieravyšaje 35 kh.

Kali ž elektrapryłada pa techničnych charaktarystykach padobnaja da mapieda ci matacykła, jana moža ŭdzielničać u darožnym ruchu, ale dla hetaha treba paćvierdzić typ transpartnaha srodku, atrymać elektronny pašpart i zarehistravać jaho ŭ DAI.

Taksama ŭdakładniena, što terytoryi sadovych tavarystvaŭ ciapier ličacca žyłoj zonaj.

Asnoŭnyja pałažeńni ŭkaza pačnuć dziejničać z 1 vieraśnia.

Kamientary da artykuła