«Znajści numar u hateli možna i za 8 rubloŭ». Biełarus adpraviŭsia ŭ supierekanomnaje padarožža pa krainie
Amal dva miesiacy tamu Kanstancin Caryk vyjechaŭ na rovary z domu. I nazad nie pryjechaŭ. Vierniecca tolki ŭ vieraśni, kali pabyvaje va ŭsich 118-ci rajonnych centrach Biełarusi. Pra toje, jak prachodzić jaho padarožža i kolki heta kaštuje, mužčyna raskazaŭ u intervju žurnalistu Myfin.by.
Płan — prajechać 5000-6000 kiłamietraŭ pa krainie na rovary
Pra hrandyjoznuju rovarnuju pajezdku 50-hadovy mužčyna z Babrujska daŭno maryŭ, ale mahčymaści pajechać nie było. Tamu dalej rodnaha horada nie kataŭsia. Ale ŭ minułym hodzie Kanstancin vyjšaŭ na piensiju i ŭžo tady adpraviŭsia ŭ padarožža.
U 2024-m kalasiŭ pa krainie 46 dzion, namataŭ 3037 kiłamietraŭ. Tym letam metaj tura było naviedać 30 pomnikaŭ architektury z naboru «Architekturnaja spadčyna RB», vyjaŭlenych na manietach, vypuščanych Nacbankam. A na leta-2025 padarožnik razmachnuŭsia bolš surjozna.
«Dačka mnie ŭručyła ŭ padarunak skretč-kartu Biełarusi, na jakoj paznačanyja ŭsie 118 rajonaŭ krainy. Pabyvaŭ u adnym — ściraj, jak u łatarei. Kali jeździŭ «pa manietach», naviedaŭ 41 rajcentr, potym jašče 9 prajechaŭ. Usiaho letaś ich było 50. I ja zrazumieŭ, što maja zadača na 2025 hod — naviedać astatnija 68 rajcentraŭ».
Vyjechaŭ u padarožža Kanstancin 31 maja. Papiarednie nanios na kartu ŭsie 68 rajcentraŭ, jakija treba było naviedać, i adznačyŭ samyja cikavyja miescy. Da siaredziny leta pabyvaŭ užo ŭ 40 rajcentrach, prajechaŭšy 2700 kiłamietraŭ.
Viarnucca dadomu jon płanuje nie raniej za vierasień. Pa prybliznych padlikach, prajedzie 5000-6000 kiłamietraŭ.
Łajfchak u darohu: jak nikoli nie myć patelniu (i tak — jana zastaniecca čystaj)
Padarožničaje Kanstancin na rovary Greenland, jaki nabyŭ letaś za 1100 BYN. Z saboj — nałobny lichtar, nabyty na «Aliekspresie» za $120 namiot, spalnik i flisavy ŭkładyš dla spalnika. Abaviazkova aptečka i palavaja kuchnia: čajnik, kastrula, patelnia i hazavaja harełka, a da jaje samyja tannyja bałony sa «Śviatłafora» za 3,29 BYN.
«Na aluminijevuju patelniu ŭsie skardziacca, što ŭsio na joj pryharaje. A ŭ mianie nie pryharaje. Ubačyŭ u adnaho błohiera antypryharny dyvanok dla patelni, u vyhladzie hrampłaścinki, taksama kupiŭ. Układaješ jaho ŭ patelniu, smažyš. I patelnia čystaja, navat myć nie treba, tolki dyvanok pracierci.
Zaŭsiody ŭ zapasie jość para kansiervaŭ i rołtanaŭ, piure zavarnoje — na vypadak, kali raptam nadychodzić čas abiedu, a ja na trasie. Jedu ŭ zručnym tempie, rekordy nie staŭlu. Niekatoryja ravarysty 150-180 km za dzień namotvajuć. Ja zvyčajna — 60-80 km».
«U Horkach paabiedaŭ šykoŭna za 4,80 BYN, a ŭ Rečycy — za 5,5 BYN»
U darozie Kanstancin maksimalna pa mahčymaści ekanomić. Načuje ŭ namiocie na haradskich plažach, zonach adpačynku na aziorach i kiempinhach, ježu kuplaje ŭ kramach.
«Ale kali da času abiedu akazvajusia ŭ rajcentry, to pa «Jandeksie» šukaju, dzie pajeści. Raduje, što ŭ maleńkich miastečkach jość zavodskija stałoŭki, dzie vielmi jakasna i tanna hatujuć. U Horkach na «Elevatary» paabiedaŭ šykoŭna za 4,80 BYN, a ŭ stałoŭcy Rečyckaj meblevaj fabryki — za 5,5 BYN. Navat ni razu nie kuplaŭ šaurmu, tamu što treba addać 10-15 BYN. Praściej uziać chutkarastvaralny sup abo kansiervy: z rołtanam źjeŭ i pajechaŭ dalej».
Načlehi, kali treba, taksama vybiraje niedarahija.
Adzin raz zdymaŭ łožka-miesca ŭ damku na zdymačnaj placoŭcy «Biełaruśfilma» kala Smalavičaŭ, abyšłosia heta ŭ 30 rubloŭ.
Płata za načleh 30 BYN — heta, chutčej, vyklučeńnie z praviłaŭ. Ale na rajon u tuju noč abrynuŭsia hrad, tamu ryzykavać u namiocie nie staŭ.
«Ale bolšaja častka načej, viadoma, u namiocie. Šmat videarolikaŭ hladzieŭ, jak biaśpiečna načavać, prytrymlivajusia hetych instrukcyj. Časta možna načavać na plažach u rajcentrach, dzie jość videakamiery. Padychodžu zvyčajna da supracoŭnikaŭ Tavarystva ratavańnia na vodach i cikaŭlusia, dzie možna stać z namiotam, jany pakazvajuć. Milicyja pieryjadyčna pryjazdžaje, praviaraje abstanoŭku».
«Samy tanny hatel, što mnie traplaŭsia, byŭ u Čerykavie, zapłaciŭ 8,33 BYN. Ździviŭsia, što znajści numar u hateli možna i za 8 BYN. Nie moža być! Kab pamycca ŭ dušy, treba było asobna zapłacić jašče 4,20 BYN. Vodhuki na hatel supiarečlivyja, ale ja zastaŭsia zadavoleny — śviežyja biełyja praściny, zručny łožak.
U Drybinie, samym maleńkim rajonnym centry Biełarusi, dzie žyvie kala 3000 čałaviek, zdymaŭ u hateli adnamiesny numar za 23 BYN. Pad Mahilovam načavaŭ u siabra, a ŭ Chocimsku — u cieścia».
Načavać biaspłatna puskali vandroŭnika i zusim nieznajomyja ludzi.
«Cikavy načleh, jaki jašče ništo nie pieraplunuŭ, byŭ u Rahačoŭskim rajonie, na terytoryi sanatoryja «Prydniaproŭski». Tam pryšvartavaŭsia debarkader, adziny płyvučy hatel u nas u krainie. Niezabyŭnyja adčuvańni! Jaho ŭładalnik, Siarhiej, pasialiŭ mianie ŭ adnamiesny numar i nie staŭ brać hrošaj za načleh. Ja raskłaŭ rečy, jon da mianie zachodzić, kaža: «Kościa, ty padarožnik, u ciabie pa darozie pralnych mašyn niama, voś tazik, parašok, kab rečy pamyć. A voś tut paviesiš, prasušyš». Čałaviek mianie pieršy raz bačyŭ, biaspłatna pasialiŭ i voś tak z razumieńniem pastaviŭsia!»
«Važu kiepku jak talisman i nie budu zdymać da samaha Babrujska»
Ludzi, adznačaje babrujec, jamu zaŭsiody traplajucca vydatnyja:
«U Słaŭharadskim rajonie pryjechaŭ na Błakitnuju krynicu, tam hrupa ludziej była, razhavarylisia. Akazałasia, što heta kiraŭnictva słaŭharadskaha filijała zavoda «Babuškina krynka». Pacikavilisia, moža, jość niejkija prablemy. Ja kažu, voś, złamałasia macavańnie na ramie rovara dla padnožki. «Pryjazdžaj, — kažuć, — zaŭtra paśla načoŭki da nas, pahladzim, što možna zrabić».
Ja pryjechaŭ — i mała taho, što macavańnie papravili, dyk jašče i pačastavali syram u dehustacyjnaj zale, padaryli firmovuju kiepku. Važu jaje ciapier jak talisman i nie budu zdymać da samaha Babrujska. Asobnaja padziaka kiraŭnictvu zavoda i zvarščyku Dźmitryju, u jakoha załatyja ruki».
U Śviata-Uśpienski manastyr u Pustynkach kala Mścisłava Kanstancin pryjechaŭ, kab akunucca ŭ kupieli. Spytaŭ u manacha, ci možna z namiotam spynicca za terytoryjaj manastyra:
«Jon adkazaŭ, što treba spytać u nastajaciela, kali skončycca słužba. Ja dačakaŭsia zakančeńnia, vychodzić nastajaciel, ajciec Hienrych, zacikaviŭsia, raspytaŭ mianie, adkul nakiroŭvajusia i kudy. I kaža manachu: «Pasialicie jaho ŭ manastyry». U samim manastyry, ujaŭlajecie? I skazaŭ abaviazkova pryjści na viačeru. Nakarmili pa-chatniamu. I, kaža, zaŭtra, pierš čym vy pajedziecie ŭ padarožža, abaviazkova ŭ nas paješcie, tolki potym jedźcie».
«U miesiac davodzicca tracić u rajonie 1000 BYN»
Choć Kanstancin i padarožničaje biudžetna, nielha skazać, što pajezdka atrymlivajecca kapieječnaj. Pierš čym vyjechać z Babrujska, jon pravieryŭ stan rovara ŭ viełamajsterni, kab być upeŭnienym, što «koń» nie padviadzie na trasie. I ŭsio adno, budučy ŭ Mahilovie, vydatkavaŭ 438 BYN na dobryja zapčastki.
«Heta była hłabalnaja trata hrošaj, zatoje ciapier jedu i ŭpeŭnieny, što ŭ mianie dobryja pakryška i łancuh, uzmocnieny vobad. U maleńkich miastečkach časam niama viełamajsterni, a złamacca pasiarod lesu nie chočacca.
Letaś paznajomiŭsia z uładalnikam kramy «Drajv» u Połacku. Užo skantaktavaŭsia, jon skazaŭ, kab zajazdžaŭ na techahlad. Znajomy i z uładalnikam viełamajsterni ŭ Słonimie. Jon mianie taksama čakaje, sočyć za mnoj, łajkaje videa, da jaho ŭ hości zajedu».
«Praktyčna ŭsiudy, dzie tolki mahčyma, płaču telefonam, karystajusia dadatkam Swoo Pay. Ale nie va ŭsich kramach takoje mahčyma, tamu dastaju kartu. Plus zaŭsiody jość z saboj drobnymi kupiurami 50-100 BYN.
U maleńkich haradach naviedvańnie muzieja kaštuje 3 BYN, ekskursavod — taksama 3 BYN, patrebna drobiaź. Niejak dastaŭ 50 BYN, a rešty niama, dyk źbirali ŭsim muziejem. Patrebnyja najaŭnyja, kab kupić što-niebudź na trasie. Pamiataju, žančyna pradavała kłubnicy kala vioski, kupiŭ za 10 BYN skrynačku».
U miesiac, paličyŭ babrujčanin, davodzicca tracić u rajonie 1000 BYN. Choć jon i imkniecca być vielmi aščadnym. Ale možna, kaža, i ŭ 600-700 BYN ukłaścisia. Zaležyć ad taho, dzie načuješ i što jasi, ci naviedvaješ muziei i zamki. Nie ŭsiudy košt kvitka — try rubli. Dapuścim, uvachod u Mirski zamak kaštavaŭ 17,50 BYN.
«Padpisčyk jechaŭ da mianie z Asipovičaŭ 85 km — adčuŭ siabie miehazorkaj rovarnaha maštabu»
Svaje darožnyja natatki Kanstancin tranśluje ŭ instahramie. Staronku jon zavioŭ hoda paŭtara tamu i vykarystoŭvaŭ jak dziońnik, kudy vykładaŭ fatahrafii. Paśla letašniaha padarožža padpisčykaŭ dadałosia niašmat, čałaviek z 70. I jany paraili bolš zdymać videa. Hetym letam jon tak i zrabiŭ. Kolkaść padpisčykaŭ stała raści, ciapier ich 1,2 tysiačy.
Roliki Kanstancin zapisvaje z charakternym jaŭrejskim havarkom z aniekdotaŭ, nazyvajučy siabie «tavaryš Kac».
«Vyklučna z pavahi da jaŭrejaŭ. Fiška takaja, ja ž z Babrujska. Ludziam cikava, zadajuć pytańni. Videa, źniataje pra prypynak u Śvietłahorskim rajonie, naohuł nabrała 340 tysiač prahladaŭ.
Ździviŭ moj padpisčyk Ženia z Asipovičaŭ. Jon ubačyŭ, što ja jedu na Kličaŭ, i pryjechaŭ paznajomicca ŭžyvuju. Prajechaŭ 85 km! Adčuŭ siabie miehazorkaj rovarnaha maštabu. Było vielmi pryjemna».
Pa darozie Kanstancin spyniajecca kala ŭsich cikavych słavutaściaŭ i zdymaje videa, raskazvaje pra ŭražańni.
«U Biełarusi vielmi šmat pryhožych miescaŭ, pra isnavańnie niekatorych ja navat nie padazravaŭ. Lohka znajści, kudy patracić čas adpačynku: jedź, palubujsia starym zamkam, kaściołam, spynisia na malaŭničaj bazie adpačynku.
U nas vietlivy, spahadlivy narod, u nas biaśpiečna. Rabotniki aŭtazapravak naljuć vady pitnoj, prapanujuć zaradzić telefon biez prablem. Supracoŭniki Tavarystva ratavańnia na vodach na plažach padkažuć, dzie pastavić namiot. Na trasie kiroŭcy prytarmožvajuć, abjazdžajuć pa sustrečcy.
Karystajučysia z vypadku, chaču padziakavać majmu dobramu znajomamu Mikałaju Michajłaviču Bielčynu — za słušnyja parady i padtrymku. I, viadoma, dziakuj žoncy i dačce za doŭhija čakańni mianie doma».
Da kanca maršrutu ŭ Kanstancina Caryka jašče bolš za miesiac. A nastupnaja pajezdka pakul tolki ŭ dalokich płanach.
«Jość u mianie zapavietnaja mara — źlatać na Kubu. I tam na rovary prajechać ad adnaho kanca vostrava da inšaha. Ale na heta treba hrošaj šmat. U samalotach možna pieravozić 23 kh sportinvientara. Tak što nie z maim ciapierašnim rovaram lacieć. Jon ciažki, 17 kh, a jość śpiecyjalnyja dla padarožžaŭ, lahčejšyja. Kali znojdziecca sponsar na maju pajezdku, to hatovy vylecieć pieršym ža rejsam!»
Błohier paraŭnaŭ košt adpačynku ŭ sanatoryi «Radon» z pajezdkaj na kitajski vostraŭ Chajnań — i byŭ šakavany
U jakija krainy dla biełarusaŭ najbolš darahija turystyčnyja vizy? Lidar niečakany
Skandynavija pryciahvaje biełarusa: dalnabojščyk raskazaŭ ab pracy ŭ krai vikinhaŭ
Samy praciahły maršrut — 140 kiłamietraŭ za dzień. Eks-palitviazień Andrej Kuźniečyk zaciaty viełasipiedyst — jon raskazaŭ pra svajo chobi
Siamja ź Biełarusi na svajoj mašynie prajechała kala 10 tysiač kiłamietraŭ dziela Ehiejskaha mora
Kamientary
Vyjšaŭ na piensiju rana
Možna i pavandravać ciapier