Prezidentku Šviejcaryi abvinavačvajuć u naniasieńni krainie miljardnych strataŭ, bo nie ŭmieła razmaŭlać z Trampam

Prezident ZŠA Donald Tramp niadaŭna abkłaŭ Šviejcaryju nadzvyčaj vysokimi pošlinami — 39%. U samoj Šviejcaryi adkaznaść za heta ŭskładajuć na prezidenta krainy — kažuć, Karyn Kieler-Zuter pravaliła razmovu, piša Bild na padstavie paviedamleńniaŭ šviejcarskaj presy.

Kałaž: Bild

Usiaho try tydni tamu Karyn Kieler-Zuter chvaliłasia ŭ adnym intervju, jak joj «udałosia znajści da Trampa padychod». Pry padrychtoŭcy da pieramoŭ ź im jana navat pračytała jaho knihu «Mastactva ździełki». Adnak u vyniku joj heta nie dapamahło.

31 lipienia ŭ 20:30 Kieler-Zuter stelefanavałasia z Trampam i sprabavała damahčysia pahadnieńnia ab 10-pracentnych pošlinach. Trampu hetaha było mała, i razmova ŭ peŭny momant pierajšła ŭ stan eskałacyi.

Pa danych šviejcarskaj haziety 24 Heures, prezidentka Šviejcaryi sprabavała vyratavać stanovišča i niekalki razoŭ tłumačyła surazmoŭcu, jak u ZŠA ŭźnik deficyt handlovaha bałansu ŭ pamiery 39 miljardaŭ dalaraŭ. Ale heta, vidavočna, tolki pahoršyła situacyju — Tramp uspryniaŭ tłumačeńni jak «maralizatarstva» i sprobu jaho «pavučać».

Pavodle infarmacyi vydańnia, u 20:38 šviejcarski dypłamat, jaki ŭdzielničaŭ u pieramovach, atrymaŭ SMS ad amierykanskaha boku: lepš skončyć razmovu, pakul situacyja kančatkova nie vyjšła z-pad kantrolu. Praź dźvie chviliny zvanok zaviaršyŭsia i stała jasna — ździełki nie budzie.

Paźniej uviečary z Vašynhtona pryjšła ahłušalnaja zajava: ZŠA ŭvodziać dla Šviejcaryi jašče bolš vysokija pošliny, čym pahražali — 39%! Ź Biełaha doma rastłumačyli: Šviejcaryja admoviłasia iści na sastupki.

U šviejcarskim uradzie Kieler-Zuter abvinavačvajuć u naiŭnaści, piša 24 Heures — u jaje nie akazałasia płana «B» na vypadak pravału pieramovaŭ. Kiraŭnik technałahičnaj asacyjacyi Swissmem Stefan Brupbachier nazvaŭ mytnaje fijaska «čornym dniom»: «Heta stavić pad pahrozu dziasiatki tysiač pracoŭnych miescaŭ u pramysłovaści».

Šviejcaryja maje namier pasprabavać pravieści paŭtornyja pieramovy. Paśla ekstrannaha pasiadžeńnia 4 žniŭnia ŭrad abviaściŭ, što hatovy zrabić ZŠA «jašče bolš pryvabnuju prapanovu». Ciapier pytańnie ŭ tym, ci prymie jaje Tramp.

Kamientary da artykuła