Tramp uvioŭ udakładnienyja pošliny ŭ dačynieńni da dziasiatkaŭ krain

Pošliny, jakija nazvanyja ŭ ukazie «udakładnienymi adkaznymi», ustupiać u siłu praź siem dzion, i tolki ŭ dačynieńni da Kanady jany ŭstupajuć u siłu adrazu.

Pry hetym u dačynieńni da Kanady Tramp pavysiŭ pošliny z 25% da 35%. Praŭda, hetyja pošliny nie raspaŭsiudžvajucca na tavary, jakija achoplivaje handlovaje pahadnieńnie ZŠA, Mieksiki i Kanady USMCA — heta pieradusim pradukcyja, całkam zroblenaja z paŭnočnaamierykanskaj syraviny albo pradukcyja hłybokaj pierapracoŭki ź impartnaj syraviny.

Samyja vysokija pošliny atrymała Siryja — 41%, a taksama Łaos i Birma — pa 40%. Samyja nizkija — 10% — atrymali Vialikabrytanija i asobna jaje Fałklendskija astravy.

U hrafie «Brazilija» ŭ apublikavanym Biełym domam śpisie taksama fihuruje 10%, choć dniom raniej Tramp padpisaŭ ukaz ab 50-pracentnaj pošlinie na impart z hetaj krainy. Impart ža z bolšaści krain u śpisie, jak i ź Jeŭrasajuza, budzie abkładacca — kali Tramp znoŭ nie pieradumaje — pošlinami ŭ pamiery 15%.

Indyja, jak Tramp i abiacaŭ napiaredadni, atrymała 25-pracentnyja pošliny.

U Jeŭropie samyja vysokija pošliny atrymali Šviejcaryja — 39% i Sierbija — 35%.

Z usich krain, čyj impart Tramp vyrašyŭ abkłaści najbolš vysokimi taryfami, tolki Šviejcaryja źjaŭlajecca prykmietnym dla ZŠA handlovym partnioram: u minułym hodzie jana ekspartavała ŭ Złučanyja Štaty tavaraŭ na 63,4 młrd dołaraŭ.

Kitaja ŭ śpisie niama: ź im, svaim hałoŭnym handlovym partnioram, ZŠA viaduć asobnyja pieramovy.

Asobny punkt u ukazie Trampa pryśviečany sprobam paźbiehnuć vysokich pošlin, ekspartujučy tavar u ZŠA praz trecija krainy. Taki tavar, kali jaho sapraŭdnaje pachodžańnie vyjavić amierykanskaja mytnia, budzie abkładacca 40-pracentnaj pošlinaj.

Słužba mytni i pamiežnaha kantrolu ZŠA ŭžo karała za takuju praktyku kampanii, što impartujuć tavary z Kitaja. Donald Tramp abviaściŭ ab novych vialikich pošlinach na impart z bolšaści krain — handlovych partnioraŭ ZŠA ŭ pačatku krasavika, ale zatym adkładaŭ uviadzieńnie hetych vysokich stavak, u apošni raz — da 1 žniŭnia.

Za hetyja miesiacy ab źnižeńni stavak na impart bolšaści svaich tavaraŭ z Trampam i jaho administracyjaj damovilisia niekalki krain i Jeŭrasajuz:

• Vialikabrytanija — z 25% da 10%
• Japonija — z 25% da 15%
• Filipiny — z 20% da 19%
• Vjetnam — z 46% da 20%
• Indaniezija — z 32% da 19%

Jeŭrasajuz u asobie kiraŭnika Jeŭrakamisii Ursuły fon der Lajen tolki na dniach damoviŭsia z Trampam ab 15-pracentnaj pošlinie (zamiest zajaŭlenaj Trampam 30-pracentnaj) u adkaz na nulavyja pošliny ŭ dačynieńni da amierykanskich tavaraŭ u Jeŭropie.

Praŭda, heta ŭsio — ramkavyja damoŭlenaści, paŭnavartasnych handlovych pahadnieńniaŭ jašče niama.

Hałoŭny handlovy partnior ZŠA, Kitaj, vytrymaŭ «aŭkcyjon taryfaŭ» u pieršyja tydni, kali Tramp uźnios pošliny na kitajski impart da zavobłačnych 145%, i dačakaŭsia, što amierykanski prezident sam u mai źniziŭ ich da 30%.

Zaraz iduć pieramovy Vašynhtona i Piekina ab tym, što budzie dalej: na hetym tydni ŭ Stakholmie bieź vidavočnych dla publiki vynikaŭ prajšoŭ treci raund.

• 0
• 0
• 2
• 3
• 0
• 0
• 1
• 0