Biełčyhunka dapuściła defołt pa karparatyŭnych bondach
Biełaruskaja čyhunka nie zmahła svoječasova vykanać svaje finansavyja abaviazki pa karparatyŭnych ablihacyjach, piša Myfin.by.
Fota ilustracyjnaje
Jak paviedamiła Ministerstva finansaŭ, jana nie vypłaciła pracenty za 80-y i 81-y pieryjady, a taksama nie pahasiła ablihacyi 11-ha vypusku, jakija mieli termin abaračeńnia z kastryčnika 2018 pa červień 2025 hoda. Mienavita praz hety vypusk čyhunka pryciahnuła 70 miljonaŭ dołaraŭ.
Hety vypusk adbyvaŭsia pry ŭdziele Banka raźvićcia Biełarusi, a depazitarnym centram vystupaŭ Biełarusbank.
U suviazi z parušeńniem zakona «Ab rynku kaštoŭnych papier» Minfin zabaraniŭ Biełaruskaj čyhuncy vypuskać novyja ablihacyi.
Ciapier u abaračeńni jašče zastajecca adzin vypusk ablihacyj BČ na sumu 30 miljonaŭ dołaraŭ, jaki pavinien być pahašany da kanca 2026 hoda, z pracentnaj staŭkaj 6% u hod.
Darečy, raniej pradstaŭnik Minfina adznačaŭ, što ŭ pieršaj pałovie hoda defołtaŭ u Biełarusi nie było, choć u 2024 hodzie niavykananyja abaviazki pa ablihacyjach skłali amal 11 miljonaŭ rubloŭ — heta tolki 0,2% ad ahulnaj sumy. Jon taksama patłumačyŭ, što defołt — heta nie admova płacić, a zatrymka vypłat.
Čytajcie taksama:
Milicyja stanie bolš pilna sačyć za čyhunkaj
Biełaruskaja čyhunka źbirajecca puścić bolš ciahnikoŭ u Maskvu