Stała viadoma, što za 200 tysiač jeŭra prapanoŭvali Siarhieju Cichanoŭskamu «biełaruskija biznesmieny»
Nasamreč heta hrošy rasijskaha miljaniera.
Śviatłana i Siarhiej Cichanoŭskija ŭ Varšavie 27 červienia 2025 hoda. Fota: Getty Images
U siaredzinie lipienia 2025 hoda małaviadomyja apazicyjnyja aktyvisty Rusłan Chazin i Viačasłaŭ Japiška prapanavali Siarhieju Cichanoŭskamu 200 tysiač jeŭra. Uzamien jon musiŭ dać finansavuju spravazdačnaść Ofisa Śviatłany Cichanoŭskaj, a taksama źviestki pra jaje asiarodździe.
Chazin — kolišni rabotnik «Hrodna Azota», jaki paśla pracavaŭ elektramantažnikam u Rasii. U 2020-m dałučyŭsia da pratestaŭ i ŭrešcie byŭ vymušany emihravać u Polšču. Tam jamu znajomyja dapamahli z časovym žyllom, a jon sam pačaŭ šukać pracu. Japiška — historyk i drobny pradprymalnik z Bresta.
Na ich zvarot pradkazalna nichto i nie adreahavaŭ. Zrešty, ideja nasamreč nie vyhladała surjoznaj — adkul u hetych aktyvistaŭ mahli źjavicca takija hrošy? A kali ŭ ich i jość resursy na palityčnuju baraćbu, čamu jany ich nie vykarystoŭvali, a čakali vyzvaleńnia Cichanoŭskaha.
«Naša Niva» raspytała Siarhieja Cichanoŭskaha pra tuju dziŭnuju situacyju. Akazałasia, što jon usio ž sustreŭsia z Chazinym — 6 žniŭnia ŭ Varšavie ŭ hruzinskim restaranie «Cichary». I toj pryznaŭsia, što heta za hrošy.
Rusłan Chazin. Fota: Radyjo Racyja
«Mnie skazali, što biełaruski biznesoviec Chazin choča sa mnoj sustrecca i hatovy akazać niejkuju dapamohu. Ja nie pieršy raz sustrakajusia z pradstaŭnikami biznesu, i niekatoryja sapraŭdy dapamahajuć.
Adnak, sa słoŭ Chazina, jon nie źjaŭlajecca biznesoŭcam (zajmajecca elektramantažnymi rabotami i ciapier pakutuje ad niedachopu zakazaŭ) i nie maje mahčymaści asabista dapamahčy mnie ŭ niejkich inicyjatyvach. Ale potym jon prapanavaŭ mnie hrošy rasijskaha aliharcha Leanida Nieŭźlina — kala 300 000 jeŭra biez usialakich asabistych sustreč i abaviazkaŭ», — raskazvaje Cichanoŭski.
Jak akazałasia, prapanova vyrasła ŭ paŭtara razu.
Leanid Nieŭźlin, fota Navalny.com
Chazin patłumačyŭ Cichanoŭskamu, što hrošy ŭ ich ź Japiškam videazvarocie byli nie ŭłasnyja. Ich daŭ razam z mašynkaj dla padliku hrošaj Nieŭźlin tolki dla zdymki videa.
«Jon patłumačyŭ, što rolik byŭ zrobleny, kab patrolić Ofis, a da mianie asabista ŭ ich nijakich pretenzij niama», — praciahvaje Cichanoŭski.
«Ja patłumačyŭ, što ŭ Ofisie nie pracuju i nie mahu adkazvać za ich pracu! Ja chaču, kab biełaruskija spravy padtrymlivaŭ sumlenny biełaruski biznes. I mnie zusim niezrazumiełaja zacikaŭlenaść Nieŭźlina va ŭsim hetym, jak i jaho kamandy — vajavać suprać majoj žonki i jaje kamandy, raspuskać paklop i naćkoŭvać ludziej pamiž saboj. Taksama ja čuŭ i pra kryminalnuju spravu, zaviedzienuju pa fakcie napadu na rasijskaha apazicyjaniera (dzie śćviardžajecca, što zakazčykam źjaŭlajecca Nieŭźlin)! Vidavočna, što takaja padryŭnaja dziejnaść vyhadnaja tolki FSB i KDB.
Ja vielmi caniu svaju niezaležnaść i, navat prymajučy danaty ad biznesu, nikoli nie biaru na siabie nijakich abaviazkaŭ! Kali vam chtości skaža advarotnaje — viedajcie, što pierad vami durań abo padluha!», — pierakonvaje jon.
Leanid Nieŭźlin — rasijski miljarder, kolišni partnior Michaiła Chadarkoŭskaha pa «Jukasie». Žyvie ŭ Izraili, źjaŭlajecca zaciatym krytykam Uładzimira Pucina, taksama zmahaŭsia z kamandaj Alaksieja Navalnaha. Na jaho hrošy isnuje rasijskaja «Sota».
Nieŭźlin sprabuje ŭpłyvać i na situacyju ŭ Biełarusi, finansujučy ŚMI i inicyjatyvy, jakija vystupajuć suprać Alaksandra Łukašenki i sprabujuć dyskredytavać Śviatłanu Cichanoŭskuju. U pryvatnaści, jon źjaŭlajecca sponsaram Chartyi'97.