U homielskaj milicyi raskazali, kudy adpraŭlajuć pracavać «darmajedaŭ»

Milicyja ŭ Homieli praciahvaje «adpracoŭku» hramadzian, jakich unieśli ŭ bazu «niezaniatych u ekanomicy». Aficyjna biespracoŭnych sprabujuć pracaŭładkoŭvać z dapamohaj siłavikoŭ užo piaty miesiac: vyklikajuć u RAUS na masavyja schody i tam abaviazvajuć źjavicca ŭ centr zaniataści. Taksama milicyjanty naviedvajuć biespracoŭnych doma, apytvajuć ich susiedziaŭ, piša «Fłahštok».

Fota: Homielski rajvykankam

Za hety čas, z krasavika 2025 hoda, usich homielskich «darmajedaŭ» achapić jašče nie paśpieli. Pavodle źviestak na 1 žniŭnia, jakija nazvaŭ načalnik Savieckaha RAUS Uładzimir Saŭčanka ŭ publikacyi časopisa «Biełka», hety rajadździeł milicyi «adpracavaŭ» bolš za 7 tysiač čałaviek. A ŭsiaho ŭ bazie «niezaniatych u ekanomicy» zvyš 10 tysiač žycharoŭ Savieckaha rajona.

Kali za čatyry miesiacy praz vyklik u milicyju prajšli 7 tysiač «darmajedaŭ», to vychodzić, što ŭ siarednim u miesiac siłaviki vysyłajuć pozvy kala 1750 aficyjna biespracoŭnym. Atrymlivajecca, u kastryčniku pavinny pravieści ŭžo apošnija «vychavaŭčyja mierapryjemstvy».

Načalnik RAUS nazvaŭ takuju dziejnaść milicyi «hramadskaj nahruzkaj» i ŭdakładniŭ, na jakija śpiecyjalnaści časta nakiroŭvajuć «darmajedaŭ».

Pavodle jaho słoŭ, ciapier u Homieli vialiki popyt na elektramancioraŭ i zvarščykaŭ, miechanizataraŭ i technołahaŭ, kiroŭcaŭ aŭtobusaŭ i tralejbusaŭ, pradaŭcoŭ i kasiraŭ. Deficyt kadraŭ nastolki vialiki, što ludziej biez vopytu navučajuć hetym prafiesijam za košt biudžetu.

Kamientary da artykuła