«Dziakuj za kartu. Jak by mnie jaje zabrać?» Stenahrama sustrečy ŭ Biełym domie lidaraŭ Jeŭropy i ZŠA

U Biełym domie 18 žniŭnia adbylisia važnyja pieramovy z udziełam Donalda Trampa, Uładzimira Zialenskaha i jeŭrapiejskich lidaraŭ, jakija pryjechali padtrymać prezidenta Ukrainy. Prapanujem stenahramu adkazaŭ na pytańni žurnalistaŭ prezidenta ZŠA Donalda Trampa, prezidenta Ukrainy Uładzimira Zialenskaha, vystupleńniaŭ lidaraŭ krain Jeŭropy i hienieralnaha sakratara NATA Marka Rute.

Uładzimir Zialenski i Donald Tramp u Avalnym kabiniecie 18 žniŭnia 2025 hoda. Fota: Anna Moneymaker / Getty Images

Tramp i Zialenski ŭ Avalnym kabiniecie. Ustupnaja častka

Tramp: Heta honar dla nas pryniać prezidenta Ukrainy. U nas było šmat dobrych abmierkavańniaŭ. My dasiahnuli vielmi značnaha prahresu. U nas była sustreča z prezidentam Rasii. Jość šaniec, što z hetaha niešta vyjdzie. Siońnia vielmi važnaja sustreča. Dziakuj.

Zialenski: Dziakuj, spadar prezident. Kali dazvolicie, padziakuju vam za vaša zaprašeńnie i namahańni, kab spynić hetyja zabojstvy. Karystajusia mahčymaściu, kab padziakavać pieršaj łedzi ZŠA za jaje list Pucinu pra našych vykradzienych dziaciej. Pieradajcie joj list ad pieršaj łedzi Ukrainy. (Tramp biare list). Heta nie vam, heta — joj (śmiajucca). Dziakuj, što padtrymali farmat ź jeŭrapiejskimi lidarami.

Pytańni.

Prezident Zialenski skazaŭ, što Rasija pavinna zaviaršyć vajnu, jakuju sama pačała. Prezident Tramp, vy skazali, što Zialenski moža zaviaršyć vajnu amal nieadkładna, kali zachoča?

Tramp: Tak, ja dumaju, heta praŭda. Siońnia ŭ nas sustreča, i kali ŭsio spracuje, u nas budzie trochbakovaja sustreča i budzie šaniec zaviaršyć vajnu.

Heta kaniec amierykanskaj padtrymki dla Ukrainy, u zaležnaści ad taho, budzie siońnia ździełka ci nie budzie?

[Tramp]: Ja nikoli nie mahu tak skazać. Heta nikoli nie kaniec darohi. Ludziej zabivajuć, a my chočam heta spynić. Tak što ja nie skažu, što heta kaniec darohi, nie. Ja dumaju, u nas dobry šaniec zrabić heta. Ja vieru, što Pucin choča skončyć heta.

U kaho bolš kart, u Rasii ci Ukrainy?

Tramp: Ja nie chaču hetaha kazać. Ja tut, kab… Hladzicie, heta nie maja vajna, heta vajna Džo Bajdena. I my chočam heta skončyć. I my chočam heta skončyć dobra. Ukrainski narod žachliva paciarpieŭ.

Prezident Zialenski, vy hatovyja adpraŭlać vašy vojski na śmierć jašče na praciahu pary hadoŭ ci pahodziciesia pierakreślić karty?

Zialenski: Dziakuj za vaša pytańnie. Vy viedajecie, my žyviem kožny dzień pad abstrełami. Siońnia było šmat abstrełaŭ, šmat paranienych. Zahinuła dzicia. Paŭtara hoda. Nam treba spynić hetuju vajnu, spynić Rasiju. Nam patrebnaja padtrymka Amieryki i Jeŭropy. My zrobim usio, što zmožam dla hetaha, my pakažam, što my mocnyja ludzi i padtrymlivajem idei, jakija prezident Tramp prapanuje asabista, kab spynić vajnu dypłamatyčnym šlacham. My hatovyja da trochbakovaha samitu. Heta dobry sihnał ad prezidenta.

Prezident Tramp, kali ździełka budzie dasiahnuta, vy hatovyja adpravić miratvorcaŭ va Ukrainu?

Tramp: My budziem pracavać z Ukrainaj i ŭsimi astatnimi, kab zabiaśpiečyć, što kali nastanie mir, to jon budzie doŭhaterminovym. Vielmi doŭhaterminovym. My nie havorym pra mir na 1-2 hady, kab znoŭ apynucca ŭ hetym miesivie. My budziem pracavać z Ukrainaj, z Rasijaj. Kali my dabjomsia miru, heta spracuje, nijakich sumnievaŭ.

Nakont amierykanskich vojskaŭ — my skažam vam paźniej, kali sustreniemsia z cudoŭnymi lidarami cudoŭnych krain. Usie jany buduć uciahnutyja. Budzie šmat dapamohi, kali havorka idzie pra biaśpieku. Jeŭropa — pieršaja linija abarony, ale my im dapamožam taksama. My budziem uciahnutyja.

Pucin skazaŭ, što vajna nie skončycca, kali nie buduć likvidavanyja «pieršapryčyny kryzisu»? U vas jość razumieńnie, što majecca na ŭvazie pad hetym?

Tramp: Vajna skončycca. Kali jana skončycca, ja nie skažu vam. Ale jana skončycca. Hety džentlmien [Zialenski] choča, kab jana skončyłasia, Uładzimir Pucin choča, kab jana skončyłasia, uvieś śviet stamiŭsia ad hetaha. Ja ŭrehulavaŭ šeść vojnaŭ. Ja dumaŭ, što heta budzie samaja lohkaja, ale jana akazałasia składanaj.

Prezident Tramp, vy ličycie, što heta budzie sumlenny mir, kali Ukraina zdaść svaje terytoryi, jakija Rasija jašče nie zavajavała?

Tramp: Ja adkažu tolki na pieršuju častku vašaha pytańnia: u nas budzie doŭhaterminovy mir. Spadziajusia, heta budzie nieadkładna i ŭsie ŭ śviecie buduć ščaślivyja.

Prezident Zialenski, vy vyhladajecie biezdakorna ŭ hetym kaściumie.

Tramp: Ja skazaŭ toje ž samaje. (Zialenskamu): Heta toj chłopiec, jaki pryčapiŭsia da ciabie minułym razam.

Zialenski: Ja pamiataju. A vy ŭ tym ža kaściumie. Ja pamianiaŭ kaścium, a vy — nie.

Uładzimir Zialenski i Donald Tramp u Avalnym kabiniecie, 18 žniŭnia 2025 hoda. Fota: Anna Moneymaker / Getty Images

Prezident Zialenski, vy adkrytyja da vybaraŭ u vašaj krainie?

Zialenski: Tak, kaniečnie. Nam treba zrabić biaśpiečnyja ŭmovy. I nam treba zrabić niekatoruju pracu ŭ parłamiencie, tamu što padčas vajny my nie možam pravodzić vybary. I nam treba pieramirje — usiudy: na niebie, u mory, kab ludzi mahli pravieści demakratyčnyja lehalnyja vybary.

Tramp: Dyk vy kažacie, što ŭ vas nie moža być vybaraŭ padčas vajny? Dyk što, kali my budziem vajavać z kimści, to bolš nijakich vybaraŭ? Cikava, što skažuć na heta fejk ńjus.

Zialenski: Cha-cha-cha. Vam spadabałasia hetaja ideja.

Tramp: Navat kali b ja atrymaŭ Maskvu i Sankt-Pieciarburh, fejk ńjus usio roŭna skazali b, što heta drennaja ździełka.

(Zialenskamu): Sprava nie ŭ vas, choć heta ŭ niejkaj stupieni i hraje vam na karyść. Ale jakuju b ździełku ja b ni zaklučyŭ, jany skažuć: «Tramp byŭ absalutna žachlivy». Ale ja ŭsio žyćcio žyvu z hetym.

Prezident Tramp, vy skazali, što kali nie budzie spynieńnia ahniu, Rasija paniasie surovyja nastupstvy.

Tramp: Ja nie dumaju, što nam treba spynieńnie ahniu. Pahladzicie na šeść vojnaŭ, jakija ja ŭrehulavaŭ — tam išła vajna, tam nie było spynieńnia ahniu. Było b dobra mieć spynieńnie ahniu. Ale jość adna kraina, jakaja choča, i inšaja, jakaja nie choča.

U čym sens harantyj u styli 5-ha artykuła NATA, nie prymajučy Ukrainu ŭ NATA?

Tramp: Zadoŭha da Pucina było zrazumieła, što my nie prymiem Ukrainu ŭ NATA. My budziem abmiarkoŭvać heta siońnia, my dadzim im vielmi dobruju abaronu i biaśpieku. Tam nas čakajuć lidary, jakija chočuć dać abaronu, i my dapamožam im z hetym. Heta vielmi važna.

Prezident Tramp, kolki dapamohi vy hatovyja dać Ukrainie. I, prezident Zialenski, kolki vy chočacie?

Tramp: My ciapier nie dajom ničoha, my pradajom. Heta ŭsio Džo Bajden, karumpavany, nierazumny čałaviek. Kali b ja byŭ prezidentam, hetaha b nie zdaryłasia, i, darečy, dla Zialenskaha tak taksama było b lepš, tamu što jon prajšoŭ praź piekła — hetaha b nie było.

Zialenski: Ciapier u nas jość mahčymaść kuplać uzbrajeńnie, i my ŭdziačnyja za heta, za PURL (Pieralik pryjarytetnych patreb Ukrainy — NN). Heta taksama budzie častkaj harantyj biaśpieki.

Prezident Zialenski, jakija harantyi vy chočacie atrymać ad prezidenta Trampa, kab zaklučyć ździełku? Amierykanskija vojski, raźvieddanyja, abstalavańnie, što?

Zialenski: Usio:) Pieršaja častka — mocnaja ŭkrainskaja armija. Druhaja častka — abmiarkujem z partniorami, heta zaležyć ad vialikich krain — ad ZŠA i mnohich našych siabroŭ.

Prezident Tramp, što b vy skazali ŭkraincam, jakija pakutujuć ad rasijskich udaraŭ?

Tramp: Ja viedaju ŭkraincaŭ šmat hadoŭ. Heta cudoŭnyja ludzi, jany razumnyja, enierhičnyja, jany lubiać svaju krainu. Ale ja lublu ŭsich ludziej. Ja lublu rasijan taksama. Ja lublu ŭsich. Ja chaču, kab vajna spyniłasia.

Prezident Tramp, u vašaj dyskusii z Pucinym było niešta, što pakinuła vas rasčaravanym?

Tramp: My siońnia razmaŭlali z Pucinym, nie naŭprost. Paśla hetaj sustrečy ŭ nas budzie zvanok. U nas moža być trochbakovaja sustreča. A moža i nie być. Kali trochbakovaj sustrečy nie budzie, to vajna praciahniecca. Ale Pucin čakaje majho zvanka.

Padčas sustrečy Trampa i Zialenskaha ź jeŭrapiejskimi lidarami. Fota: AP Photo / Alex Brandon

Sumiesnaje pasiadžeńnie vaśmi lidaraŭ

Ustupnaja pramova Trampa:

— Paśpiachovy dzień. Dobryja dyskusii, kab spynić zabojstvy. My ŭsie nad hetym pracujem. Vielmi prostaja meta — spynić zabojstvy, urehulavać. U mianie była častka abmierkavać heta ź Zialenskim. Potym u nas budzie razmova z Pucinym. My pasprabujem prapracavać trochbakovuju sustreču, kab pahladzieć, ci možam my heta skončyć, ukłaści heta spać.

Samit na Alascy ŭmacavaŭ maju vieru, što choć mir i ciažki, ale dasiažny, ja vieru ŭ heta. Pucin pahadziŭsia pryniać harantyi biaśpieki dla Ukrainy. Heta toje, što nam treba razhledzieć, i my abmiarkujem, chto što budzie rabić.

Ja aptymistyčny nakont taho, što my kalektyŭna možam dasiahnuć pahadnieńnia, jakoje strymaje lubuju budučuju ahresiju suprać Ukrainy. Nasamreč ja dumaju, što jaje bolš nie budzie, što heta pieraaceniena. Ale my ŭbačym. Jeŭrapiejcy voźmuć na siabie vialiki ciažar, a my dapamožam im.

Taksama nam treba abmierkavać mahčymyja abmieny terytoryj, prymajučy pad uvahu ciapierašniuju liniju frontu.

Vielmi sumna hladzieć na heta. U mianie jość pačućcio, što vy z prezidentam Pucinym zmožacie niešta vypracavać. Ale heta rašeńnie, jakoje moža być pryniata tolki prezidentam Zialenskim i narodam Ukrainy pry pracy nad mirnym pahadnieńniem z prezidentam Pucinym.

Ja arhanizuju sustreču z Pucinym. Kali zachočacie — ja pajdu tudy. Nie toje kab ja vielmi chaču iści tudy, ale ja pajdu tudy, tamu što my vyratujem mnostva ludziej.

Kaniečnie, my b chacieli nieadkładnaha spynieńnia ahniu, pakul my pracujem nad doŭhaterminovym miram. Ale ŭ dadzieny momant heta nie adbyvajecca. Zialenski i Pucin zmohuć pahavaryć pra heta. Ale ja spyniŭ šeść vojnaŭ, a tam nie było papiaredniaha spynieńnia ahniu, tak što ja nie viedaju, ci treba heta.

Dumaju, što mirnaje pahadnieńnie całkam dasiahalnaje i moža być uzhodniena ŭ najbližejšaj budučyni.

Ja dumaju, siońnia my pryjdziem da rašeńnia amal pa ŭsich pytańniach, uklučajučy biaśpieku.

Donald Tramp, Uładzimir Zialenski i Monika Kroŭli, kiraŭnica słužby pratakoła Biełaha doma, a za imi — jeŭrapiejskija lidary, 19 žniŭnia 2025. Fota: AP Photo / Alex Brandon

Zatym Tramp źviarnuŭsia da Zialenskaha:

— Spadar prezident, vy chočacie skazać niešta? Pierad vami ŚMI. Kali chočacie — padychodźcie, možacie vykarystoŭvać moj mikrafon, jak vam kamfortna.

Zialenski padziakavaŭ Trampu i vyrašyŭ vystupić ź miesca:

— Vializny dziakuj. Ja dumaju, u nas vielmi dobraja razmova z prezidentam Trampam. (Tramp: Vielmi dobraja). Moža być, najlepšaja. A moža, najlepšaja budzie ŭ budučyni, ale jana była vielmi dobraja.

My havaryli pra adčuvalnyja pytańni. Pieršaje — harantyi biaśpieki. I my vielmi ščaślivyja, što ŭsie lidary tut. Biaśpieka Ukrainy zaležyć ad vas. Ad tych lidaraŭ, jakija ŭ nas u sercach. Vielmi važna, što ZŠA pasyłaje taki mocny sihnał pra hatoŭnaść da harantyj biaśpieki.

Druhi momant — a moža jon i pieršy i samy važny — humanitarny, a mienavita abmien pałonnymi. Ja dumaju, prezident dapamoža, i ja vielmi ŭdziačny vašaj žoncy za hety list.

Uładzimir Zialenski padčas sustrečy. Fota: Win McNamee / Getty Images

Vielmi važna, što pytańni harantyj biaśpieki my abmiarkujem na trochbakovaj sustrečy, jakuju pasprabuje arhanizavać prezident Tramp. Ja nie viedaju, ci zachočacie vy, ale Ukraina była b radaja vašamu ŭdziełu. (Tramp: Kali vy hetaha chočacie, ja budu tam.)

Ja pakazaŭ prezidentu mnohija detali na karcie bajavych dziejańniaŭ. Dziakuj za kartu, darečy, jana była cudoŭnaja, ja sabie dumaju, jak by mnie jaje zabrać. (Tramp: My addamo jaje vam.)

Ja ŭdziačny ŭsim lidaram. Vy vielmi dapamahajecie. I my rady, što ŭ nas takoje adzinstva siońnia.

Tramp: — Vam dziakuj. Ja dumaju, što prezident Pucin taksama choča niešta zrabić. Ja dumaju, kali my arhanizujem heta — kali, a nie kali — vy ŭbačycie pazityŭnyja rečy.

Ja viedaju, što ŭ vas kala tysiač pałonnych, i jany adpuściać ich vielmi chutka.

Nastupnym słova ŭziaŭ hienieralny sakratar NATA Mark Rute:

— Budu koratka. Udziačny vam, darahi Donaldzie. Vy raśsiekli tupik. Kali my dobra razyhrajem našy karty, my skončym heta. Treba spynić zabojstvy i ŭdary pa ŭkrainskaj infrastruktury.

Davajcie zrobim maksimum, što my možam siońnia. Ja ŭpeŭnieny, što ź siońniašniaha dnia my pryjdziem da spynieńnia hetaha jak maha chutčej.

(Zialenskamu): Taksama, Uładzimir, dziakuju vam za vaša lidarstva. Toje, što vy robicie, a taksama ŭsie jeŭrapiejskija kalehi, heta fundamientalna.

(Trampu): A vaša zhoda brać udzieł u harantyjach biaśpieki — heta vialiki krok i praryŭ, heta robić roźnicu.

Ursuła fon der Lajen padčas sustrečy. Fota: Win McNamee / Getty Images

Nastupnaj vystupała kiraŭnica Jeŭrakamisii Ursuła fon der Lajen:

— Vialikaja radaść być tut. Važny momant. My tut, jeŭrapiejcy, jak siabry i sajuźniki.

U nas byŭ fantastyčny samit NATA. Zatym my zaklučyli samuju vialikuju handlovuju ździełku ŭ historyi pamiž dźviuma samymi vialikimi ekanomikami śvietu. Ciapier my, kab pracavać nad doŭhaterminovym miram.

Rada čuć, što my pracujem nad harantyjami biaśpieki pa typu 5-ha artykuła NATA. Ale taksama ja rada, što vy zhadali pra tysiačy vykradzienych dziaciej. Jak mama i babula, ja viedaju, jak važna, kab kožnaje dzicia viarnułasia dadomu.

Vystupaje Frydrych Mierc. Fota: Win McNamee / Getty Images

Piatym słova ŭziaŭ kancler Hiermanii Frydrych Mierc:

— Donaldzie, dziakuj. Rady čuć, što ŭ vas dvaich była takaja cudoŭnaja sustreča siońnia. Nastupny krok — samy składany.

Šlach adkryty. (Trampu): Vy adkryli jaho. Ale ciapier nastanuć samyja składanyja pieramovy.

My b usie chacieli ŭbačyć spynieńnie ahniu jašče da nastupnaj sustrečy. Ja nie mahu ŭjavić, što nastupnaja sustreča adbudziecca biez spynieńnia ahniu.

Davajcie pracavać nad hetym. I davajcie cisnuć na Rasiju. Tamu što ad taho, jak my heta budziem rabić, zaležyć spynieńnie ahniu, zaležyć surjoznaść pieramoŭ».

Tramp:

— Budzie mahčymaść u prezidenta [Zialenskaha] pahavaryć z prezidentam [Pucinym]. Pahladzim, jak heta spracuje. Kali łaska, Džordža.

Vystupaje Džordža Miełoni. Fota: Win McNamee / Getty Images

I pieradaŭ słova premjer-ministru Italii Džordžy Miełoni:

— Dziakuj, spadaru prezidencie.

Heta važny dzień. Heta novy etap. Try z pałovaj hady my nie bačyli nijakich prykmiet, što jany chočuć dyjałohu. Dziakujučy vam niešta mianiajecca. Dziakuj taksama za «Starlinki» na poli boju dla Ukrainy. Heta dasiahnuta dziakujučy adzinstvu ŭsich nas. Treba pamiatać: kali my chočam dasiahnuć miru i harantavać spraviadlivaść, treba rabić heta adzinymi.

(Zialenskamu): Vy možacie raźličvać na nas. Jak i z samaha pačatku, my — na baku Ukrainy.

My pahavorym pra harantyi biaśpieki. Jak zabiaśpiečyć, kab heta nie paŭtaryłasia. My pačniom abmierkavańnie z prapanovy madeli 5-ha artykuła NATA. Pieršapačatkova heta była italjanskaja ideja.

Emanuel Makron siadzieŭ pravaruč ad Donalda Trampa. Fota: Win McNamee / Getty Images

Nastupnym vykazaŭsia prezident Francyi Emaniuel Makron:

— Dziakuj za vašu ŭciahnutaść, prezidencie. Šmat było skazana, ale treba skazać adno: usie tut vystupajuć za mir. My pracujem usie hetyja hady, kab dasiahnuć miru: tryvałaha i doŭhaterminovaha. Tamu ideja trochbakovaj sustrečy vielmi važnaja — heta adziny sposab vyrašyć heta. Heta biaśpieka ŭsiaho jeŭrapiejskaha kantynienta, tamu my abjadnanyja tut z Ukrainaj.

Jość nieabchodnaść spynieńnia ahniu, kab spynić zabojstvy. I jość nieabchodnaść harantyj biaśpieki Ukrainy.

Pieršaje — heta nadziejnaja ŭkrainskaja armija na hady i dziesiacihodździ napierad. Druhoje — uciahnutaść usich nas. Tamu «kaalicyja rašučych» pracuje nad hetym.

(Trampu): Vy možacie raźličvać na nas. Jak i my možam raźličvać na vas, kab damahčysia nadziejnaha miru dla Ukrainy i Jeŭropy».

Tramp: Dziakuj, Emanuel.

Kir Starmier. Fota: Win McNamee / Getty Images

Dalej uziaŭ słova premjer-ministr Vialikabrytanii Kir Starmier:

— My chočam miru. Vajna maje vielizarny ŭpłyŭ, asabliva dla ŭkraincaŭ, jakija ŭtrymlivajuć front. Ale taksama jana ŭpłyvaje i na Jeŭropu i Vialikabrytaniju.

Tamu kali my havorym pra biaśpieku — havorka nie tolki pra Ukrainu, ale i pra biaśpieku Vialikabrytanii i Jeŭropy. My šmat havaryli pa telefonie, ciapier u nas jość mahčymaść abmierkavać heta za stałom.

Ja adčuvaju, što z pravilnym padychodam my možam damahčysia značnaha prahresu, asabliva pa harantyjach biaśpieki.

Abmierkavańnie 5-ha artykuła supadaje z tym, što my robim u ramkach «Kaalicyi rašučych».

Z hetaj sustrečy moža atrymacca histaryčny krok u płanie biaśpieki.

Ja adčuvaju, što my možam damahčysia i prahresu na šlachu da doŭhaterminovaha miru na trochbakovym samicie, što vyhladaje jak adčuvalny nastupny krok.

Tramp: Dziakuj. Cikava, što ŭpieršyniu ŭ nas stolki kiraŭnikoŭ jeŭrapiejskich dziaržaŭ u Biełym domie. Słova vam, Aleksie. Vy małady, mocny čałaviek.

Alaksandr Stub siadzieŭ pravaruč ad Uładzimira Zialenskaha. Fota: Win McNamee / Getty Images

Prezident Finlandyi Alaksandr Stub:

Ja zapomniu vaš naratyŭ [pra maładoha i mocnaha čałavieka] i pasprabuju pierakanać maju žonku:)

Toj fakt, što my — za hetym stałom, simvaličny ŭ tym, što ŭ nas «Kamanda Amieryka» i «Kamanda Jeŭropa», jakija dapamahajuć Ukrainie razam. My čakajem prahresu nakont harantyj biaśpieki i ruchu da trochbakovaj sustrečy.

Mižnarodnyja ŚMI, napeŭna, pytajucca, čamu ja tut. Pryčyna ŭ tym, što my, choć i maleńkaja kraina, ale majem doŭhuju miažu z Rasijaj. 800 mil. I, kaniečnie, u nas svoj histaryčny dośvied z Rasijaj z časoŭ Druhoj suśvietnaj vajny.

Kali pahladzieć na toj problisk, jaki źjaviŭsia ciapier u nas, my znajšli rašeńnie ŭ 1944-m, i ja ŭpeŭnieny, što my zmožam znajści rašeńnie ŭ 2025-m, kab skončyć rasijskuju ahresiŭnuju vajnu. Situacyja vielmi składanaja. Ale dla hetaha my tut i sabralisia.

Tramp: Dziakuj. Naša sustreča praciahniecca niekatory čas. My abmiarkujem niekatoryja prablemy.

Ja sapraŭdy vieru, što… U mianie zaŭsiody byli dobryja adnosiny z [Pucinym], i jon taksama choča znajści adkaz na heta. Tak što na praciahu tydnia ci dvuch my, vidavočna, daviedajemsia, ci zmožam my vyrašyć heta, ci hetaja žachlivaja vajna praciahniecca.

Jość takaja mahčymaść, što my i nie zmožam heta zrabić. Heta mahčyma. Ale kali ŭ nas atrymajecca, my vyratujem tysiačy žyćciaŭ. Jak minimum my pavinny zrabić usio, što ad nas zaležyć.

My zaraz piarojdziem u Avalny kabiniet. Tam budziem abmiarkoŭvać usie našy temy.

Dziakuj miedyja, jakija siońnia byli vielmi sumlennyja da nas. Heta ŭsio, što my prosim ad ich.

Kamientary da artykuła