U Polščy pačali departavać zatrymanych na kancercie Maksa Karža

Pieršym viadomym vypadkam stała vysyłka 18-hadovaj ukrainki z Dniapra Anhieliny, paviedamlaje polskaje vydańnie Gazeta Wyborcza.

Dziaŭčynu zatrymali za toje, što jana skoknuła z trybuny na tancpoł. Heta traktavali jak chulihanstva, dziaŭčynie zabaranili ŭjezd u ES na 5 hadoŭ.

Anhielina pierajechała ŭ Polšču ŭ lutym 2022 hoda paśla pačatku poŭnamaštabnaha ŭvarvańnia Rasii va Ukrainu, žyła z babulaj u Pruškavie pad Varšavaj, pracavała ŭ internet-kramie.

Pavodle raskazu samoj dziaŭčyny, niepasredna ŭ dzień departacyi za joj pryjšli a šostaj ranicy i navat nie dali sabrać rečy. Paśla taho jana pajechała ŭ ciahniku ŭ Dniapro.

Padčas kancerta Karža na Nacyjanalnym stadyjonie ŭ Varšavie byli zatrymanyja i 13 hramadzian Biełarusi: siem ź ich — za kryminalnyja złačynstvy, šaściora — za drobnyja parušeńni. Ci departavali ŭžo kaho ź ich — infarmacyi pakul niama.

Ahulnaja kolkaść zatrymanych u suviazi z kancertam skłała 109 čałaviek, u asnoŭnym heta ŭkraincy.

Kamientary da artykuła