Šaściarych biełarusaŭ i 57 ukraincaŭ vysyłajuć z Polščy paśla incydentaŭ na kancercie Maksa Karža

«Tym časam ja mahu z zadavalnieńniem skazać, što nadychodzić finał situacyi, jakaja tak aburyła hramadskuju dumku, — heta biesparadki, akty ahresii i asobnyja pravakacyi na Nacyjanalnym stadyjonie padčas kancerta biełaruskaha repiera. Tam dajšło da absalutna niepatrebnych padziej, što patrabavali apieratyŭnaj reakcyi. Tolki što atrymaŭ infarmacyju. U dačynieńni da 63 asobaŭ raspačata pracedura vysyłki z krainy, jany pavinny buduć pakinuć krainu dobraachvotna abo prymusova, kali dobraachvotna nie źjeduć. U hetaj hrupie — 57 ukraincaŭ i šeść biełarusaŭ», — skazaŭ Tusk.

Jon taksama adznačyŭ, što sudy adreahavali apieratyŭna, i ŭ tych vypadkach, dzie mieli miesca pravaparušeńni abo złačynstvy, byli pryznačanyja adpaviednyja pakarańni. Premjer-ministr padziakavaŭ słužbam za chutkuju reakcyju, ale nahadaŭ, što jany taksama niasuć adkaznaść za toje, što adbyłosia.

«Dziaržava abaviazanaja dziejničać efiektyŭna i apieratyŭna, kab papiaredžvać abo karać usich vinavatych, niezaležna ad taho, ci źjaŭlajucca jany ukraincami, biełarusami, palakami ci niemcami. Heta nie maje značeńnia. Zakon pavinien vykonvacca. I ŭ dadzienym vypadku hetyja dziejańni prynieśli nieadkładnyja vyniki», — skazaŭ Tusk.

Pry hetym jon padkreśliŭ, što nielha dapuścić rostu antyŭkrainskich nastrojaŭ.

«Adnak ni pry jakich abstavinach, i ja zajaŭlaju heta z poŭnaj pierakananaściu i ŭ intaresach Polščy i našaj biaśpieki, nielha dapuścić razrastańnia antyŭkrainskich nastrojaŭ. Ukrainskija ŭłady taksama pavinny harantavać, što nikomu ŭ Kijevie, va Ukrainie abo ŭ Polščy nie pryjdzie ŭ hałavu ideja pra niejkija niepatrebnyja antypolskija žesty z boku ŭkraincaŭ», — skazaŭ jon.

Tusk nahadaŭ pra budučyja pieramovy prezidentaŭ ZŠA i Rasii, jakija mohuć pryvieści da spynieńnia vajny Rasii suprać Ukrainy. Na jaho dumku, Uładzimir Pucin nie pavinien atrymać jašče adzin padarunak.

«A takim padarunkam dla Pucina, biezumoŭna, stała b svarka ŭkraincaŭ i palakaŭ, abo, šyrej, Ukrainy i Jeŭropy», — skazaŭ jon.

Tusk dadaŭ, što palaki i ŭkraincy pavinny prajavić strymanaść.

«Mienavita tamu ja zaklikaju ŭsich razumnych, prystojnych palakaŭ reahavać tam, dzie heta nieabchodna, na zło, na abrazy, złačynstvy, pravakacyi. I niezaležna ad taho, chto ich ździajśniaje. Ale ŭ toj ža čas, jak by heta ni hučała krychu sastareła, nam usim treba być vielmi pilnymi, kab nie paddacca rasijskim manipulacyjam i pravakacyjam. My nie možam dapuścić, kab ukraincy raspalvali nianaviść da palakaŭ abo palaki da ŭkraincaŭ.

Heta było b histaryčnym złačynstvam i nievierahodnaj durnotaj, kali b my ciapier dazvolili sabie raskałocca. I kali b my dazvolili rasijanam razburyć hety pa-sapraŭdnamu ŭnikalny typ adnosinaŭ u našaj historyi, jaki nam udałosia pabudavać dziakujučy našaj haścinnaści i mužnaści ŭkraincaŭ z taho boku… Heta sapraŭdy vielmi kaštoŭna. Navat kali z abodvuch bakoŭ, jak siarod ukraincaŭ, tak i siarod nas, časam chapaje hłupaha nacyjanalizmu abo ahresiŭnaha nacyjanalizmu», — skazaŭ jon.

Tusk taksama zaklikaŭ členaŭ urada i polskich słužboŭcaŭ uličvać heta. Pavodle jaho słoŭ, jon raźličvaje na ich stałaść i adkaznaść.

Nahadajem, pierad pačatkam subotniaha kancerta častka hledačoŭ pačała saskokvać ź siadziačych miescaŭ na tancpoł. Ich sprabavali spynić supracoŭniki achovy. Paźniej była pryciahnutaja palicyja, kab nie dapuścić nastupnych incydentaŭ. Pačatak kancerta byŭ zatrymany. Arhanizatary źviarnulisia da hledačoŭ, jakija saskočyli na tancpoł, z prośbaj viarnucca na trybuny pad pahrozaj admieny kancerta. U vyniku šou Maksa Karža ŭsio ž adbyłosia.

U paniadziełak varšaŭskaja palicyja paviedamiła, što na kancercie byli zatrymanyja 109 čałaviek. 50 čałaviek aštrafavali na ahulnuju sumu 11 450 złotych (2700 jeŭra). Da hetaha ŭ piatnicu na viečaryncy prychilnikaŭ Korža ŭ rajonie Vola byli zatrymanyja 9 čałaviek. 25 čałaviek aštrafavali.

Šyroki rezanans u Polščy vyklikali kadry, na jakich bačnyja naviedvalniki kancerta z čyrvona-čornym ściaham. Čyrvona-čorny ściah vykarystoŭvała Ukrainskaja paŭstanckaja armija padčas Druhoj suśvietnaj vajny. U Polščy jon asacyjujecca z Vałynskaj trahiedyjaj.

• 33
• 0
• 4
• 3
• 1
• 0
• 1
• 0