«Na kancertach niama miesca radykalnamu nacyjanalizmu, ahresii i hvałtu». Maks Korž vykazaŭsia nakont skandału, jaki razhareŭsia paśla jaho vystupu ŭ Varšavie
Vialiki kancert biełaruskaha repiera Maksa Korža, jaki 9 žniŭnia ŭ Varšavie sabraŭ kala 80 000 čałaviek z usioj postsavieckaj prastory, skončyŭsia hučnym skandałam u Polščy i spravakavaŭ novy vitok ksienafobskich nastrojaŭ u polskim hramadstvie. Śpiavak byŭ vymušany adreahavać na krytyku z boku polskich palitykaŭ i ŚMI, jakija ŭbačyli ŭ dziejańniach fanataŭ prajavu niepavahi da polskaj historyi.
Nahadajem, što napiaredadni kancerta sotni fanataŭ zładzili stychijnuju viečarynku z fajerami i ałkaholem, a padčas samoha vystupu na Nacyjanalnym stadyjonie adbylisia sutyčki z achovaj.
U natoŭpie taksama zaŭvažyli čyrvona-čorny ściah UPA — simvał, jaki ŭ Polščy asacyjujecca z Vałynskaj raźnioj, učynienaj ukrainskimi nacyjanalistami ŭ 1943 hodzie. Dla palakaŭ heta stała šokam: u źjaŭleńni takich ściahoŭ jany pabačyli prajavy nacyjanalizmu i abrazu nacyjanalnaj pamiaci.
U vyniku palicyja zatrymała 109 čałaviek, a polskija ŭłady vyrašyli departavać z krainy 57 ukraincaŭ i 6 biełarusaŭ, jakich abvinavacili ŭ ahresiŭnych dziejańniach i parušeńniach paradku.
Siońnia śpiavak adreahavaŭ na skandał u svaim instahramie prymirenčym dopisam:
«Siabry, niama miesca radykalnamu nacyjanalizmu na kancertach, hetak ža jak i ahresii dy hvałtu ź luboha boku. Heta supiarečyć samaj sutnaści kancertaŭ. Tolki ŭzajemnaja pavaha. Padobnyja pravakacyi raspalvajuć mižnacyjanalnuju varožaść, a značyć — niedapuščalnyja.
Nikoli pieravaha adnoj nacyi nad inšymi ŭ historyi ničoha dobraha, akramia biady, nie prynosiła.
Kancerty — heta pra maładość, pra siabroŭstva, pra indyvidualnuju maru kožnaha, pra toje, što adbyvajecca ŭnutry nas, pra adzinstva nasupierak nianaviści, jakaja raspalvajecca navokał.
Na hety momant heta praktyčna adzinaje miesca, dzie chłopcy z roznych krain mohuć być adnym cełym. Tak i budzie praciahvacca. Ludzi i nadalej buduć zbližacca, niahledziačy na adzinkavyja pravakacyi.
Ja pryjechaŭ i źjechaŭ, a vam žyć razam, tamu nie paddavajciesia na manipulacyi, atrymlivajcie asałodu ad žyćcia.
A ŭsie, kamu pryjšłasia daspadoby naša atmaśfiera, naš Slavic vibe, padklučajciesia, bo my idziem dalej», — napisaŭ Maks Korž.
«Naša Niva» — bastyjon biełaruščyny
PADTRYMAĆPrezident Naŭrocki zaklikaŭ Siejm zabaranić «banderaŭskuju» simvoliku ŭ Polščy
Paźniak žorstka vykazaŭsia pra Karža: Antyestetyčnaje, antymastackaje šarłatanstva, raźličanaje na dehienieratyŭnaje ŭspryniaćcie
Šaściarych biełarusaŭ i 57 ukraincaŭ vysyłajuć z Polščy paśla incydentaŭ na kancercie Maksa Karža
Ukrainiec, jaki pryjšoŭ sa ściaham UPA na kancert Karža, zapisaŭ vybačalnaje videa
«Uschodni hihant», a sceny na kancercie — «vartyja Dante». Jak upłyvovaje polskaje vydańnie raskazała pra Maksa Karža palakam
Žychary Varšavy aburanyja pavodzinami fanataŭ Maksa Karža napiaredadni kancerta
«Nie vajnie!» Jak Maks Korž razryvaŭ Varšavu i pra što kazaŭ na svaim kancercie? REPARTAŽ
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary
Zdajecca, raniej u jaho było tolki vibe/vajb.
Niadaŭna ja tut pamyliŭsia, kali napisaŭ, što Korž nie žadaje hublać svoj 2019 ź vialikaj słavianskaj aŭdytoryjaj prychilnikaŭ. Značyć, nie mocna pamyliŭsia. Słova "słavianskaje" dla jaho niasie niejki svoj važny sens.
Miarkuju, što takimi ahulnymi prahonami jon tolki zrobić horš. Jak by i za ŭsio dobraje, suprać varožaści, ale iznoŭ ahulnymi słovami, biez dakładnych nazvaŭ vorahaŭ. Jak by i suprać ideałohij, ale heta taksama ideałohija, užo i sa svajoj nazvaj. Voś za jaje jamu napchajuć.
Kali jon sapraŭdy žadaje toje, što kaža, biez hłybokich sensaŭ, to treba być jašče aściarožniej u vykazvańniach.