Padazravany ŭ zabojstvie Parubija pryznaŭsia ŭ złačynstvie i raskazaŭ pra kantakty z Rasijaj

Ukrainskaja słužba «Radyjo Svaboda» sa spasyłkaj na svaje krynicy ŭ pravaachoŭnych orhanach paviedamiła, što padazravany ŭ zabojstvie eks-śpikiera Viarchoŭnaj Rady Andreja Parubija pryznaŭsia ŭ złačynstvie padčas pieršych dopytaŭ. Jon taksama raskazaŭ pra svaje kantakty z pradstaŭnikami Rasii.

Padazravany adrazu paśla zatrymańnia

Pa słovach zatrymanaha, 52-hadovaha žychara Lvova, u 2023 hodzie na Bachmuckim kirunku bieź viestak źnik jahony syn, jaki słužyŭ va USU. Paśla hetaha mužčyna pačaŭ sačyć za rasijskimi sacsietkami, kab atrymać choć niejkija źviestki, i tak vyjšaŭ na suviaź z rasijskim bokam. Jamu nibyta paviedamili, što syn zahinuŭ, a ŭ razmovach apraŭdvali dziejańni Rasii, uskładajučy adkaznaść za vajnu na ŭkrainskich palitykaŭ.

Padazravany paviedamiŭ, što kazaŭ rasijskim kantaktam pra svajo žyćcio ŭ Lvovie i zhadvaŭ, što bačyŭ Parubija «nieadnarazova». Ź ciaham času jon pačaŭ rychtavacca da napadu: zdabyŭ zbroju, kupiŭ rovar i šlem, a taksama aformiŭ padroblenyja dakumienty, kab nabyć aŭtamabil dla sačeńnia za palitykam.

Žurnalisty adznačajuć, što hetyja pakazańni prahučali na pačatkovych etapach śledstva i ciapier praviarajucca. Pavodle źviestak inšych ŚMI, rasijanie mahli vykarystać asabistuju trahiedyju mužčyny i nibyta prapanavali viarnuć cieła syna ŭ abmien na zabojstva viadomaha ŭkrainskaha palityka.

Kamientary da artykuła