Va Ukrainie aryštavali prarasijskaha deputata Viarchoŭnaj Rady. Jaho nibyta vydali z AAE

Słužba biaśpieki Ukrainy zatrymała i aryštavała deputata Viarchoŭnaj Rady ad prarasijskaj «Apazicyjnaj płatformy — Za žyćcio» Fiodara Chrystenku. Jaho padazrajuć u dziaržaŭnaj zdradzie, piša «Ukrainskaja praŭda».

Fiodar Chrystenka paśla zatrymańnia. Fota: Ofis Hienieralnaha prakurora Ukrainy

Ukrainskaje śledstva miarkuje, što Chrystenku jašče da pačatku poŭnamaštabnaj vajny zavierbavała FSB i jon vykonvaŭ zadańni rasijskaj śpiecsłužby, sprabujučy ŭpłyvać na kiraŭnictva Nacyjanalnaha antykarupcyjnaha biuro Ukrainy.

Paviedamlajecca, što Fiodar Chrystenka nibyta mieŭ blizkija suviazi z asobnymi kiraŭnikami hetaha orhana, u tym liku z Rusłanam Mahamiedrasułavym, jakoha ŭ lipieni zatrymała Słužby biaśpieki Ukrainy pa padazreńni ŭ viadzieńni biznesu z Rasijaj.

Chrystenku aryštavali na terytoryi Ukrainy, ale pierad tym, jak śćviardžajecca, jon znachodziŭsia ŭ Abjadnanych Arabskich Emiratach. 

Jak śćviardžaje vydańnie Zn.ua, byłoha deputata viarnuli z AAE va Ukrainu nie praz aficyjnuju ekstradycyju, a pa palityčnaj damoŭlenaści pamiž uładami dźviuch krain. 

Pavodle krynic vydańnia, viartańnie Chrystenki adbyvałasia pad asabistym kantrolem vysokapastaŭlenych asob. Z ukrainskaha boku hetym zajmaŭsia były ministr abarony Rustem Umieraŭ pa daručeńni prezidenta Ukrainy Uładzimira Zialenskaha. U AAE navat jeździŭ namieśnik kiraŭnika SBU Alaksandr Pakład, paśla čaho Chrystenka «dobraachvotna» pahadziŭsia viarnucca.

Adrazu paśla zatrymańnia Chrystenku dastavili ŭ sud, dzie jamu vyznačyli mieraj strymańnia ŭtrymańnie pad vartaj.

Kamientary da artykuła