SBU ŭkaraniła svajho ahienta ŭ maskoŭski ofis paplečnika Janukoviča, jaki zajmaŭsia špijanažam dla FSB
Jašče da pačatku šyrokamaštabnaj vajny Słužba biaśpieki Ukrainy zmahła ŭvieści svajho ahienta ŭ ofis u Maskvie, jakim kiravaŭ Uładzimir Siŭkovič — były namieśnik sakratara Rady nacyjanalnaj biaśpieki i abarony časoŭ prezidenctva Viktara Janukoviča, jakoha ciapier padazrajuć u dziaržaŭnaj zdradzie, piša vydańnie Hromadske.
Pavodle krynicy ŭ SBU, ahient pracavaŭ u hetym ofisie jak kiroŭca-pamočnik. Jon zdoleŭ atrymać davier Siŭkoviča i źbiraŭ infarmacyju pra dziejnaść ofisa, jaki padparadkoŭvaŭsia rasijskim śpiecsłužbam.
Siŭkoviča abvinavačvajuć u supracoŭnictvie z FSB, arhanizacyi śpiecapieracyj va Ukrainie i viarboŭcy špijonaŭ. Śledstva śćviardžaje, što jon razam z kiraŭnikom SBU Kryma Aleham Kuliničam uvachodziŭ u złačynnuju hrupu, stvoranuju 5-j słužbaj FSB dla praviadzieńnia padryŭnoj dziejnaści suprać Ukrainy.
Siŭkovič, pavodle abvinavačańnia, pieradavaŭ sakretnuju infarmacyju rasijanam i ŭpłyvaŭ na kadravyja rašeńni ŭ siłavych strukturach Ukrainy. Kab prykrycca, jon adkryŭ tak zvany «palityčny ofis» u Maskvie.
Spravu ab dziaržzdradzie ŭžo pieradali ŭ sud. Siŭkoviča taksama padazrajuć u arhanizacyi infarmacyjnych pravakacyj suprać Ukrainy (u tym liku praz deputata Niestara Šufryča) i ŭ datyčnaści da razhonu studenckaha Majdanu 30 listapada 2013 hoda.
Aleha Kuliniča zatrymali jašče ŭ lipieni 2022 hoda. Ukrainski Śledčy kamitet miarkuje, što jon pracavaŭ na FSB pad pseŭdanimam «Pakaciharošak». Jon špijoniŭ, prasoŭvaŭ svaich ludziej va ŭładu i padbuchtorvaŭ da zdrady. Akramia taho, jon viedaŭ pra płany napadu z Kryma, ale maŭčaŭ i zabaraniŭ dasyłać dakumienty ŭ centr SBU.
U pieršyja hadziny ŭvarvańnia Kulinič pieraškadžaŭ infarmavańniu pra situacyju, zahadaŭ supracoŭnikam pakinuć pazicyi i razdaŭ zbroju asobam, jakija nie mieli dačynieńnia da słužby. Taksama śledstva raźbirajecca, čamu nie była pryviedziena ŭ dziejańnie vybuchoŭka na Čanharskim moście ŭ Chiersonskaj vobłaści.
Ciapier čytajuć
Nasta Bazar pastupiła na prahramu Kalinoŭskaha i choča stać sacyjałahiniaj: «Vučoba paśla 40 hadoŭ — svojeasablivy eliksir maładości»61
Kamientary