Kiraŭnik Hienštaba Polščy: Biełaruś chavaje zabojcu našaha vajskoŭca. Rana ci pozna jon paŭstanie pierad sudom

Hienierał Viesłaŭ Kukuła zajaviŭ taksama, što Vojska Polskaje było hatovaje i da horšaha varyjantu ataki bieśpiłotnikami.

Načalnik Hienieralnaha štaba Vojska Polskaha hienierał Viesłaŭ Kukuła. Fota: gov.pl

Načalnik Hienieralnaha štaba Vojska Polskaha hienierał Viesłaŭ Kukuła ŭ intervju dla telekanała TVP Info prakamientavaŭ padziei apošniaha tydnia, u tym liku ataku rasijskich bieśpiłotnikaŭ na terytoryju Polščy i rolu Biełarusi ŭ ciapierašniaj hieapalityčnaj situacyi. Niekatoryja jaho słovy pryvodzić Onet.pl.

Pra ataku bieśpiłotnikaŭ

Hienierał Kukuła padkreśliŭ, što polskaja armija i siły NATA byli hatovyja da incydentu i mahli dać rady navat horšamu scenaru. Jon adznačyŭ, što ŭ noč z 9 na 10 vieraśnia, kali rasijskija drony zalacieli ŭ pavietranuju prastoru Polščy, reakcyja była imhniennaj i skaardynavanaj.

«Nie atakujuć taho, chto nie baicca, chto padrychtavany. Siły NATA adreahavali jak adzin kułak. Sa mnoj źviazvalisia kalehi ź inšych krain. My byli hatovyja da horšaha varyjantu raźvićcia padziej, čym toj, što adbyŭsia», — zapeŭniŭ hienierał.

Jon taksama rastłumačyŭ, čamu nie ŭsie drony byli źbityja:

«Mocnaja armija spałučaje duch z rozumam. Kali chtości zapuskaje drony-prynady, jon raźličvaje, što my vydatkujem svaje srodki supraćpavietranaj abarony, a potym moža ŭdaryć balistyčnymi ci kryłatymi rakietami».

Žyćcio ŭ pastajannaj hatoŭnaści

Načalnik Hienieralnaha štaba Vojska Polskaha taksama vykazaŭ mierkavańnie, što ŭ najbližejšyja hady Polščy pahražaje nie stolki pramaja vajna, kolki žyćcio ŭ «časy pastajannaj tryvohi». Jon padtrymaŭ uklučeńnie siren pavietranaj tryvohi ŭ haradach na ŭschodzie krainy, nazvaŭšy heta nieabchodnym krokam dla padrychtoŭki nasielnictva da žyćcia va ŭmovach «padtrymańnia pastajannaj hatoŭnaści».

«Rasija zastajecca mocnaj i niepradkazalnaj. Pry spryjalnych abstavinach jana moža napaści na nas vajennym šlacham», — prakamientavaŭ hienierał Kukuła.

Pra Biełaruś

Najbolš rezka kiraŭnik Hienštaba vykazaŭsia na adras Biełarusi.

«My majem abmiežavany davier da Biełarusi. Treba pamiatać, što jany chavajuć zabojcu našaha vajskoŭca [Matevuša Sitaka]. Jany viedajuć, chto heta. I my viedajem. Nadydzie taki dzień, što miortvy ci žyvy jon paŭstanie pierad pravasudździem», — zajaviŭ hienierał.

Kamientary da artykuła