Čempijonka pa tajskim boksie pierabiła tatu z tvaram Łukašenki ŭ siabie na nazie
Eks-fielčarka chutkaj dapamohi, šmatrazovaja čempijonka Biełarusi pa tajskim boksie Anastasija Kałašnikava pierabiła tatu z tvaram Alaksandra Łukašenki ŭ siabie na nazie. Novuju viersiju jana pakazała ŭ padkaście «Niešta budzie», piša «Lusterka».
Tatu Anastasii Kałašnikavaj da (źleva) i paśla. Kałaž z skrynšotaŭ videa
«Daŭno chacieła zrabić [pierabić], ruki nie dachodzili, a tut dajšli. Mała taho, što heta samaja darahaja maja tatuiroŭka, jana jašče i samaja balučaja», — raskazała Anastasija.
Tatuiroŭku z tvaram Łukašenki dziaŭčyna nabiła ŭ 2010 hodzie. Jak jana raskazvała ŭ intervju Ivanu Prusu ŭ listapadzie 2020 hoda, zrabiła heta nieabdumana.
«Ja nie vyłučałasia abdumanymi ŭčynkami ŭ tym uzroście. Ale vypraŭlać ja jaje nie chaču», — kazała piać hadoŭ tamu Anastasija.
Tady jana taksama raskazvała, što kali nabiła tatu, jaje mama raspłakałasia — dumała, što dačku pasadziać. Pry hetym u 2013 hodzie Nastu zatrymlivali praz hetuju tatuiroŭku.
«Supracoŭnik milicyi navat udaryŭ mianie pa hetaj nazie. Heta značyć, jon prosta Alaksandra ŭdaryŭ u tvar. Heta mianie dzika aburyła, ja pačała spračacca ź im, i paśla hetaha mianie zatrymali. Heta było niedaloka ad stadyjona «Alimpijski « (u Minsku takoha stadyjona niama, jon jość u Maskvie i Kijevie. — Zaŭv. red.), ja była ŭ šortach, pryjechała da znajomych.
Da mianie padyšoŭ čałaviek biez formy, nie pradstaviŭsia, skazaŭ, kab ja pajšła, pačaŭ mianie maciukać, ja ahryzałasia, jon udaryŭ pa nazie [z tatu]. Pa pratakole ja źbiła čatyroch amapaŭcaŭ i łajałasia matam», — raskazvała Kałašnikava.