U Nvidia prablema: zanadta šmat hrošaj

U hihanta pa vytvorčaści čypaŭ dla štučnaha intelektu Nvidia jość prablema, jakoj pazajzdrościŭ by luby kankurent: u kampanii zanadta šmat hrošaj. I hety vielizarny kapitał treba niekudy ŭkładać, bo tradycyjnyja mietady ŭžo nie spraŭlajucca z takim patokam. Ale heta nie tak prosta.

Kiraŭnik Nvidia Džensien Chuanh prezientuje novyja raspracoŭki kampanii na vystavie CES 2025 u Łas-Viehasie. Fota: Artur Widak / NurPhoto via Getty Images

Za apošnija dni Nvidia trapiła ŭ zahałoŭki nie dziakujučy svaim rekordnym prodažam čypaŭ, a dziakujučy hihanckim čekam, jakija jana vypisvaje. Spačatku kampanija abviaściła pra inviestycyi ŭ pamiery 5 miljardaŭ dalaraŭ u svajho daŭniaha kankurenta, vytvorcu čypaŭ Intel. A ŭžo ŭ paniadziełak źjaviłasia navina pra płan inviestavać da 100 miljardaŭ dalaraŭ u kampaniju OpenAI na praciahu niekalkich hadoŭ.

Hetaja ličba, jak adznačaje vydańnie The Wall Street Journal, asabliva ŭražvaje na fonie taho, što litaralna try hady tamu Nvidia hienieravała krychu bolš za 6 miljardaŭ dalaraŭ hadavoha svabodnaha hrašovaha patoku. Ale bum štučnaha intelektu i raźviazanaja im honka inviestycyj zrabili Nvidia nie tolki samaj darahoj kampanijaj u śviecie, ale i adnoj z samych finansava mahutnych.

Za apošni hod Nvidia zhienieravała 72 miljardy dalaraŭ svabodnaha hrašovaha patoku, i, pavodle acenak, da kanca finansavaha hoda hetaja ličba nablizicca da 100 miljardaŭ. Heta bolš, čym u luboj inšaj technałahičnaj mieha-kampanii, za vyklučeńniem Apple.

Čamu tradycyjnyja šlachi nie pracujuć?

Znajści prymianieńnie takim vielizarnym sumam — niaprostaja zadača. Nvidia ŭžo vykarystoŭvaje standartnyja instrumienty.

Za apošni hod kampanija vydatkavała amal 50 miljardaŭ dalaraŭ na vykup ułasnych akcyj i niadaŭna dadała jašče 60 miljardaŭ da hetaj prahramy.

Kampanija taksama za dva apošnija hady padvoiła vydatki na daśledavańni i raspracoŭki. Ale navat heta nie paśpiavaje za vybuchovym rostam prodažaŭ. Kali raniej na daśledavańni išło ŭ siarednim 22% vyručki, to ciapier — usiaho 9%, bo dachody rastuć značna chutčej.

Vykarystańnie hetych srodkaŭ na bujnoje pahłynańnie taksama vielmi małavierahodnaje. Jak nahadvaje aŭtar, jašče ŭ 2020 hodzie kupla kampanii Mellanox za 6,9 miljarda dalaraŭ sutyknułasia z supracivam u Piekinie. I heta było zadoŭha da taho, jak ažyjataž vakoł ŠI zrabiŭ čypy Nvidia centram sapiernictva pamiž ZŠA i Kitajem.

Siońnia, kali čypy Nvidia stali centram hieapalityčnaha sapiernictva pamiž dźviuma krainami, lubaja bujnaja ździełka ŭ halinie čypaŭ amal harantavana zapatrabuje ŭchvaleńnia Kitaja, atrymać jakoje budzie vielmi składana. Da taho ž, kiraŭnik Nvidia Džensien Chuanh addaje pieravahu nievialikim metavym ździełkam, a nie hihanckim pahłynańniam.

Novaja stratehija: inviestycyi ŭ ekasistemu

Nie majučy mahčymaści kupić bujnoha hulca, Nvidia pačała inviestavać u klučavych partnioraŭ i navat kankurentaŭ, kab umacavać usiu ekasistemu štučnaha intelektu — i, viadoma, svaje pazicyi ŭ joj.

Inviestycyi ŭ OpenAI — jaskravy prykład. 100 miljardaŭ dalaraŭ dapamohuć stvaralniku ChatGPT pabudavać vyličalnyja mahutnaści, dla jakich… spatrebicca vielizarnaja kolkaść čypaŭ Nvidia.

Siervier Nvidia HGX H100. Fota: Marlena Sloss/Bloomberg via Getty Images

Hetaja ździełka vyhladaje ŭ peŭnym sensie «kruhavoj»: Nvidia daje hrošy, jakija ŭ vyniku viernucca da jaje ž u vyhladzie zakazaŭ. Analityki ličać, što prybytak ad prodažu čypaŭ, chutčej za ŭsio, pieravysić pieršapačatkovyja inviestycyi.

Inviestycyi ŭ Intel — jašče bolš niečakany krok, uličvajučy daŭniaje sapiernictva pamiž kampanijami. Ale i tut jość vyraznaja łohika.

Pa-pieršaje, palityčna, bo dapamahaje ŭmacavać ajčynnaha amierykanskaha vytvorcu, što adpaviadaje palitycy ŭrada ZŠA. Pa-druhoje, heta moža dapamahčy Nvidia źnizić zaležnaść ad svajho asnoŭnaha vytvorčaha partniora — tajvańskaj kampanii TSMC. I treciaje — supracoŭnictva moža pryvieści da stvareńnia novych rašeńniaŭ dla karparatyŭnych klijentaŭ, jakija ŭžo vykarystoŭvajuć sierviery na bazie pracesaraŭ Intel.

Jašče niekalki hadoŭ tamu sajuz Intel i Nvidia zdavaŭsia b fantastykaj. Ale siońnia finansavaja moc Nvidia nastolki vialikaja, što kampanija moža dazvolić sabie być vielikadušnaj i pieratvarać byłych kankurentaŭ u partnioraŭ, farmirujučy budučyniu ŭsioj industryi na svaich umovach.

Kamientary da artykuła