U Hrodnie padletak prahłynuŭ vialikuju kostačku ad niektaryna. Daktaram daviałosia pakarpieć

U Hrodzienskuju abłasnuju dziciačuju kliničnuju balnicu źviarnuŭsia 15‑hadovy padletak, jaki vypadkova prahłynuŭ vialikuju kostačku ad niektaryna. Dastać jaje akazałasia zusim nie prosta, piša vydańnie «Pierśpiektiva».

Kostački niektaryna. Fota ilustracyjnaje

Spačatku miedyki pasprabavali dastać kostačku z dapamohaj endaskopa, ale biezvynikova: praz stravavod jana prachodziła, a dalej — nie. Tady chłopčyka adpravili dadomu, spadziejučysia, što pradmiet vyjdzie naturalnym šlacham. Adnak praź niekalki dzion pry kantrolnym ahladzie vyśvietliłasia, što kostačka zastajecca na tym ža samym miescy.

Tady daktaram daviałosia pravieści šerah dadatkovych manipulacyj, kab apuścić kostačku ŭ pramuju kišku. Tady padletku zrabili klizmu, i ŭžo za noč inšarodnaje cieła vyjšła.

Jak adznačyŭ endaskapist Dźmitryj Kryviecki, padobnych vypadkaŭ u ich praktycy raniej nie było. Praŭda, niadaŭna ŭ hetuju ž samuju balnicu dastavili 4‑hadovuju dziaŭčynku z Hrodna, jakaja prahłynuła šklanoje sercajka niemałych pamieraŭ. Ale tuju situacyju atrymałasia chutka i paśpiachova vyrašyć: pradmiet dastali sa straŭnika.

Kamientary da artykuła