U Siryi vydali ordar na aryšt Bašara Asada

U Damasku vydali ordar na aryšt byłoha prezidenta Siryi Bašara Asada ŭ suviazi z padziejami ŭ Daraa ŭ 2011 hodzie. Pra heta paviedamiŭ śledčy sudździa Taŭfik al-Ali, paviedamlaje ahienctva Sana.

Bašar Asad. Fota: SANA FILE via AP

Order uklučaje abvinavačvańni ŭ namieranych zabojstvach i katavańniach, što pryviali da śmierci, a taksama niezakonnym pazbaŭleńni voli. Heta rašeńnie daje mahčymaść pieradačy ordara ŭ Interpał i rasśledavańnia spravy na mižnarodnym uzroŭni.

Rašeńnie stała adkazam na pazoŭ, padadzieny siemjami achviar incydentaŭ viasny 2011 hoda ŭ Daraa.

Pratesty ŭ Daraa pačalisia ŭ sakaviku 2011 hoda. U kancy krasavika dla ich padaŭleńnia ŭ horad byli ŭviedzieny vojski i braniatechnika. Siły biaśpieki Siryi adkryli ahoń pa demanstrantach, kab spynić akcyi pratestu. Pavodle aktyvistaŭ, za pieršyja paŭtara miesiaca pratestaŭ u Daraa zahinuli sotni ŭdzielnikaŭ mitynhaŭ. Hetyja padziei stali katalizataram dla šyrokamaštabnych antyŭradavych pratestaŭ i pačatku hramadzianskaj vajny ŭ Siryi, jakaja faktyčna praciahvałasia bolš za 13 hadoŭ, až da źviaržeńnia režymu Asada ŭ kancy minułaha hoda.

8 śniežnia 2024 hoda Ministerstva zamiežnych spraŭ Rasii zajaviła, što Bašar Asad paśla pieramoŭ z udzielnikami ŭzbrojenaha kanfliktu pakinuŭ pasadu prezidenta Siryi. Tym ža viečaram jon razam ź siamjoj prybyŭ u Maskvu, dzie Rasija dała jamu prytułak.

Kamientary da artykuła