U Hruzii apazicyja sprabavała šturmavać prezidencki pałac

Pavodle papiarednich źviestak štaboŭ kiroŭnaj partyi «Hruzinskaja mara», jana atrymlivaje pieramohu na miascovych vybarach, nabraŭšy bolš za 70% hałasoŭ va ŭsich municypalitetach, uklučajučy Tbilisi i najbujniejšyja harady krainy. Pra heta zajaviŭ premjer-ministr Hruzii Iraklij Kabachidze. Apazicyja, adnak, ad pačatku nazyvała hetyja vybary farsam i «rasijskaj śpiecapieracyjaj» i admoviłasia ad udziełu ŭ ich.

Skrynšot ź videa

Iraklij Kabachidze paviedamiŭ, što, pavodle źviestak Centralnaj vybarčaj kamisii, na ŭčastki pryjšli amal 1,2 miljona hramadzian, što adpaviadaje pakazčykam aktyŭnaści na vybarach 2014 i 2017 hadoŭ. Pavodle jaho słoŭ, vybarčy praces prachodzić spakojna i va ŭmovach, «svabodnych ad luboha cisku».

Fota: AP Photo/Zurab Tsertsvadze

Apazicyja z hetym zusim nie zhodnaja i raspačała vuličnyja pratesty. Mitynhoŭcy nazyvajuć urad «Hruzinskaj mary» nielehitymnym i abviaścili ab pačatku «mirnaj pieradačy ŭłady».

Fota: AP Photo/Zurab Tsertsvadze

Kala prezidenckaha pałaca adbyvajucca sutyčki pamiž demanstrantami i siłavikami. Śpiecnaz MUS Hruzii vykarystaŭ vadamiot, kali pratestoŭcy sprabavali prarvacca ŭ rezidencyju prezidenta. Akramia taho, śpiecnaz užyŭ ślozatačyvyja hranaty ŭ centry Tbilisi.

U MUS Hruzii zajavili, što «akcyja vyjšła za ramki schodu i manifiestacyi, praduhledžanych zakonam».

Kamientary da artykuła