Małdova pakazała, jak Pucinu i Łukašenku možna davać pa zubach i ŭ hibrydnaj vajnie

Ja rady pieramozie ŭ Małdovie prajeŭrapiejskich siłaŭ. Hladžu na hetyja padziei ź nie mienšaj zacikaŭlenaściu i tryvohaj, jak na bajavyja dziejańni va Ukrainie. Bo tut — i nie tolki tut — taksama prachodzić samy sapraŭdny front, adno što tolki vajny pakul nie kłasičnaj, ale hibrydnaj. I hety front dla Pucina nie mienš važny, čym toj, jaki pralahaje va ŭkrainskich stepach.

Rasija — suśvietny lidar pa raźvićci technałohij hibrydnaj vajny, dumaju, heta možna kazać bieź nijakaha pierabolšańnia. Zdajecca, usia enierhija i ŭsie intelektualnyja siły hetaha zusim nie biastalentnaha naroda ŭ apošnija paru dziasiatkaŭ hadoŭ skiravalisia mienavita ŭ hetuju śfieru, i ni na što inšaje ich nie zastałosia. I jašče hrošy, nieźličonyja miljardy hrošaj. Heta trahiedyja i samoj Rasii, i ŭsiaho cyvilizavanaha śvietu. Ale takija kałasalnyja resursy kinutyja tudy nie darma — viaršyniaŭ u hetaj śfiery dasiahnuć udałosia sapraŭdy niebyvałych.

I ŭpartaje žadańnie Pucina praciahvać vajnu va Ukrainie dy niepachisnaja viera ŭ svaju kančatkovuju pieramohu ŭ tym liku i tym tłumačacca i na tym hruntujucca, što jon upeŭnieny — jahonyja hibrydnyja technałohii nieŭzabavie dazvolać jamu padarvać supraciŭ zachodniaha śvietu ź siaredziny, što ŭ peŭny momant ciapierašnija jakija-nijakija, ale ŭsio ž zbolšaha antypucinskija ŭrady ŭ Jeŭropie buduć adzin za adnym pavodle pryncypu damino sypacca i zamianiacca na «pucinfierštejeraŭ». I heta budzie kardynalna mianiać situacyju, adkryvajučy Pucinu darohu ŭsio dalej i dalej na zachad.

Hetyja raźliki sapraŭdy apraŭdanyja i rezonnyja, kali raźličvać, što jeŭrapiejskija demakratyi buduć hulać pa tych praviłach, na jakija pucinskija hibrydnyja technałohii i raźličanyja. Technałohii hetyja akurat i hruntujucca na tym, što supierniki Rasii buduć hulać pa praviłach, u toj čas jak jana sama — biez pravił. Pucincy viedajuć, što ŭ takim vypadku pieramoha niepaźbiežna budzie za imi, bo niemahčyma prystojnamu čałavieku pieramahčy, hulajučy ŭ karty stroha pa praviłach z šuleram. Z šuleram treba nie hulać jak z narmalnym, a davać jamu rezki adpor, i tolki na toj movie, jakuju jon razumieje.

Voś u Małdovie jakraz adpor i dali, i zusim niakiepska atrymałasia. Choć, kaniešnie, pieramoha dasiahnutaja nie pa praviłach idealnaj demakratyi. Idealnaja demakratyja ź sietkami Šora palemizavała b na vybarčych učastkach, a nie davała b im previentyŭna pa zubach. Paśla, praŭda, hałasiła b na papiališčy demakratyi, pakolki praciŭnik jaŭna nie byŭ by takim samym vielikadušnym…

Padsumuju — Pucina, na žal, mała pieramahčy na realnym poli boju, jašče bolš važnaja pieramoha nad im u hibrydnaj vajnie, jakaja raskinuła svaje ščupalcy našmat bolš šyroka, praktyčna na ŭvieś śviet. A heta vymahaje i pieraasensavańnia dy pierahladu mnohich raniejšych padychodaŭ, vobrazna kažučy, zakoŭvańnia demakratyi ŭ braniu. My bačym užo na praktycy, što tak ci inačaj heta adbyvajecca, praces idzie. I čym bližej da realnaj linii frontu — tym intensiŭniej. I hety praces budzie niepaźbiežna praciahvacca, adzinaja alternatyva hetamu — paraza i śmierć.

Małdova, a krychu raniej rodnasnaja joj Rumynija stali volaj losu vyprabavalnymi palihonami, na jakich technałohii davańnia adporu ŭ hibrydnaj vajnie adpracoŭvalisia i prachodzili aprabacyju. Hetyja krainy pakazali, što supraćstajać Rasii ŭ hibrydnaj vajnie ŭ pryncypie možna. Jak raniej Ukraina pakazała i praciahvaje pakazvać, što možna supraćstajać u vajnie realnaj. I jak va ŭkraincaŭ siońnia ŭsia Jeŭropa maje vučycca, jak adbivać dronavyja ataki i ŭvohule vieści sučasnuju vajnu, tak u małdavan inšym užo moža kansultavacca, jak davać pa zubach rasijskim hibrydnym sietkam padčas elektaralnych kampanij. I nie tolki padčas ich. Bo vajna poŭnamaštabnaja, i tolki vybarami jana nijak nie abmiažoŭvajecca. I heta vajna nie na žyćcio, a na śmierć.

• 39
• 0
• 1
• 2
• 0
• 0
• 0
• 1