Andreja Pačobuta znoŭ na paŭhoda kinuli ŭ PKT
Jak stała viadoma Biełaruskaj asacyjacyi žurnalistaŭ, palitźniavolenaha Andreja Pačobuta jašče 23 žniŭnia źmiaścili ŭ pamiaškańnie kamiernaha typu na šeść miesiacaŭ — da lutaha 2026 hoda.
Andžej Pačobut. Fota: press.pl
Dakładna nie viadoma, ci źmiaścili žurnalista ŭ adzinočnuju kamieru.
U vieraśni z Pačobutam znoŭ na praciahły čas pieraryvałasia listavańnie. Praz heta možna padazravać, što jon byŭ u štrafnym izalatary, dzie viaźniam nie dazvalajuć navat listy. Žurnalist taksama nie atrymlivaje ni rečavych, ni charčovych pieradač, a ŭ PKT ahułam urezanaje charčavańnie.
Staršynia Sajuza palakaŭ u Biełarusi Anžalika Borys paśla apošniaj sustrečy z Pačobutam u navapołackaj kałonii sioleta 23 vieraśnia adznačała, što jon vielmi schudnieŭ i važyć 73 kiłahramy, što «krytyčna mała». Spadarynia Borys paviedamiła pra ahulnaje paharšeńnie zdaroŭja palitźniavolenaha žurnalista — vysoki arteryjalny cisk, prystupy arytmii. Taksama ŭ hutarcy z polskim vydańniem Rzeczpospolita jana raskazała pra apieracyju pa vydaleńni jazvaŭ sa skury, jakuju niadaŭna pieranios palitźniavoleny žurnalist.
Krynica BAŽ udakładniła, što Pačobutu vydalali furunkuły. Dakładna nieviadoma, rabili hnojnuju apieracyju ŭ špitali ci ŭ miedčastcy kałonii. Chutčej za ŭsio — u miedčastcy, miarkuje krynica.
Andrej Pačobut byŭ aryštavany 25 sakavika 2021 hoda. Sud nad im adbyŭsia ŭ Hrodzienskim abłasnym sudzie. 8 lutaha 2023 hoda sudździa Dźmitryj Bubienčyk prysudziŭ žurnalistu 8 hadoŭ pazbaŭleńnia voli ŭ kałonii ŭzmocnienaha režymu.
Praktyčna ŭvieś čas źniavoleńnia Pačobut pravodzić u kamiernym izalatary abo ŭ štrafnym izalatary ŭ poŭnaj izalacyi, biez mahčymaści kantaktavać z rodnymi. 16 krasavika 2025 hoda žurnalist adznačyŭ za kratami svoj 52‑hi dzień naradžeńnia.