Pamiežny pierachod u Bieniakoniach zakryty całkam
Pamiežny pierachod «Salečniki» (ź biełaruskaha boku «Bieniakoni») całkam zakryty, a praz «Miedniki» («Kamienny Łoh») mohuć jechać niekatoryja katehoryi asob, u tym liku i biełarusy, paviedamlajuć litoŭskija pamiežniki.
Pierachod «Bieniakoni». Fota: Mytny kamitet
Voś poŭny śpis tych, chto moža jechać praz «Miedniki» («Kamienny Łoh»):
— dypłamaty i asoby, što pieravoziać dypłamatyčnuju poštu;
— pasažyry, jakija nakiroŭvajucca tranzitam u Kalininhradskuju vobłaść ź Biełarusi i nazad;
— hramadzianie Litvy i krain ES (a taksama členy ich siemjaŭ);
— asoby, jakija majuć dazvoł na žycharstva ŭ Litvie.
Nahadajem, što siońnia ŭrad Litvy pryniaŭ rašeńnie pra zakryćcio miažy ź Biełaruśsiu minimum da sierady. Paśla pasiadžeńnia ŭrada stanie viadoma pra dalejšaje raźvićcio situacyi. Litoŭski bok hatovy da doŭhaterminovaha zakryćcia miažy.
«My ŭžo padrychtavali rašeńnie ab zakryćci miažy ź Biełaruśsiu na nieakreśleny termin», — zajaviła premjer-ministr Inha Ruhinienie.
Viečaram 26 kastryčnika čarhovy raz była spyniena praca Vilenskaha aeraporta. Heta ŭžo treci viečar zapar, kali z-za vialikaj kolkaści kantrabandysckich šaroŭ z boku Biełarusi spynialisia paloty i zakryvalisia pamiežnyja punkty propusku. Ahułam u kastryčniku było sarvana bolš za 170 rejsaŭ u litoŭskich aeraportach, paciarpieli 27 000 pasažyraŭ.