Navukoŭcy źniali na videa rybinu, jakaja žyvie na hłybini bolš za 8 tysiač mietraŭ
Navukoŭcam udałosia zafiksavać rybinu na hłybini 8336 mietry ŭ Idzu-Ahasavarskim žołabie ŭ Cichim akijanie. Heta ciapier samaja hłybokavodnaja ryba, jakuju ŭdałosia zafiksavać. Jana pieraŭzychodzić papiaredniuju rekardsmienku z Maryjanskaj upadziny, dzie ryba žyła na hłybini 8178 mietraŭ, piša IFLScience.
Ryba na hłybini 8022 mietry. Fota: Minderoo-Uwa Deep Sea Research Centre
Idzu-Ahasavarski žołab znachodzicca ŭ zachodniaj častcy akijana, dzie cichaakijanskaja plita zahłyblajecca pad inšyja kantynientalnyja plity. Tut navukoŭcy spačatku «złavili» rybinu nieviadomaha vidu na hłybini bolš za 8 kiłamietraŭ, a paśla zafiksavali jaje jašče hłybiej — na 8336 mietrach pad pavierchniaj vady. Ubačyć jaje možna ciaham pieršych 15 siekund videa.
Prafiesar Ałan Džejminsan z Centra hłybokavodnych daśledavańniaŭ Minderoo-UWA (Aŭstralija) adznačaje, što hałoŭnymi faktarami, jakija vyznačajuć žyćcio na takich hłybiniach, źjaŭlajucca nie tolki cisk i hłybinia, ale i tempieratura vady. U Idzu-Ahasavarskim žołabie vada krychu ciaplejšaja, čym u Maryjanskim, bo jon bližej da Paŭdniovaha akijana, i hetaja roźnica ŭ 1°C moža istotna źmianić ekałohiju ŭnutry žołaba.
Na hłybini 8022 mietry vučonyja vyjavili vid ryb-ślimakoŭ (liparysaŭ) Pseudoliparis belyaevi. A na hłybini 8336 mietry byŭ źniaty inšy padobny vid, jaki navucy byŭ jašče nieviadomy. Bolšaść ryb-ślimakoŭ žyvie na mienšych hłybiniach, ale niekatoryja zdoleli adaptavacca da bolš ekstremalnych umoŭ, čym lubyja inšyja pazvanočnyja.
Hetyja ryby dasiahajuć 20—25 sm u daŭžyniu i charčujucca rakapadobnymi, jakija žyvuć u žołabie i spažyvajuć pareštki arhanizmaŭ, što apuskajucca ź vierchnich słajoŭ vady. Pareštki mohuć dasiahać dna praź niekalki tydniaŭ ci miesiacaŭ. Ale rakapadobnyja zdolnyja vykarystoŭvać i hetyja materyjały jak ježu.
Prafiesar Džejminsan padkreślivaje, što Idzu-Ahasavarski žołab — unikalny: na Ziamli niama inšych padvodnych upadzin takoj hłybini z adnosna ciopłaj vadoj.
Čytajcie taksama:
Ziełandyja: kantynient, jaki amal całkam schavany pad vadoju