MAK źbirajecca zabaranić spartoŭcam-transhiendaram udzielničać u žanočych spabornictvach
Mižnarodny alimpijski kamitet (MAK) razhladaje mahčymaść zabaranić transhiendarnym spartoŭkam udzielničać u žanočych spabornictvach na Alimpijskich hulniach. Jak paviedamlaje The Times, aficyjnaje rašeńnie mohuć abjavić u pačatku 2026 hoda, paśla publikacyi vynikaŭ navukovaha daśledavańnia pra fizičnyja adroźnieńni pamiž mužčynami i žančynami.
Fota: MAK
Pavodle krynic vydańnia, daśledavańnie było prezientavanaje miedycynskim i navukovym dyrektaram MAK doktaram Džejn Torntan padčas zakrytaha pasiadžeńnia minułaha tydnia.
Pradstaŭniki MAK u kamientary BBC adznačyli, što «pracoŭnaja hrupa praciahvaje abmierkavańnie» i kančatkovaje rašeńnie pakul nie pryniataje, ale ŚMI miarkujuć, što vynikam moža stacca ŭviadzieńnie poŭnaj zabarony na ŭdzieł transhiendarnych spartovak u žanočych katehoryjach.
Da hetaha MAK nie vyznačaŭ adzinych praviłaŭ datyčna ŭdziełu transhiendaraŭ, dazvalajučy mižnarodnym spartovym fiederacyjam samastojna raspracoŭvać normy. Adnak novaja prezidentka Mižnarodnaha alimpijskaha kamiteta Kirści Kovientry zajaviła, što MAK pavinien uziać inicyjatyvu na siabie i damahčysia ahulnaha padychodu.
Raniej šerah mižnarodnych arhanizacyj — World Athletics, FINA, UCI i ICC — užo zabaranili ŭdzieł transhiendarnych spartovak u žanočych spabornictvach, kali pierachod adbyŭsia paśla pałavoha vyśpiavańnia.
Čytajcie taksama:
Tramp zabaraniŭ transhiendarnym spartsmienkam udzielničać u žanočych spabornictvach
Mižnarodnaja fiederacyja płavańnia ŭvodzić katehoryju dla transhiendaraŭ
Namieśnik ministra sportu: Nas sa ściahami nie dapuskajuć, a zamianiajuć transhiendarami